Tuesday, November 6, 2007

ياليتني طفلة



ياليتني طفلة مثلها ..

ياليتني ماكبرت عنها


ياليتني باقية صغيرة

أرتب ألعابي وألمّها



أشوف الدنيا بألواني ...

وبلوحات ايدي ارسمتها ...


يلاعبني ظفر أمي ...

يغني لي قبل نومي ...

ولا شكيت بليلي البرودة ...

اندثرت أتدفى بحضنها ...



ياليتني طفلة

أضحك من وسط قلبي ...

أشوف الدنيا فرحانة ...

وأشوف الورد في دربي ...

ولا أدري بكل وردة...

حولها الأشواك تلفها ...



ولا أدري بظلم الناس ...

ولا أدري بظلام الكون ...

ولا أعرف من الليل ...

إلا النجوم أحبها ..!



يا ليتني طفلة ...

أركض في وسط الحوش ..

وأحاول أصعد شجرة التوت ...

وتحذرني أمي أصعدها ...

وما أسمعها .. وأصعدها ...

وأطيح وتنجرح ريلي ...

ولا اني سمعت أمي .. ولا اني خذيت التوت



يا ليتني طفلة ...

أزور البحر كل اسبوع ...

يعلقني أبوي على جتفه ...

ويسبح فيني ... وأقول له يغوص ..

وبعدها نيمّع الأصداف ...

ونبني بالرمل القصور ...

ونركب قارب صغير ...
ونصيد السمج بـ " القرقور "


واذا اسبوع ما زرته

أزعل وأشيل الدنيا ...

ولا أفهم شنو يعني

ظروف ودنيا تدور


يا ليتني طفلة ...

أحب أرسم على الدفتر ...

وأحل الواجب بالألوان ...

ولما توصيني الأبلة أكتب بالقلم الرصاص..

أعاندها .. وأرد أكتب بالألوان ..!


ولما كان الواجب نرسم الفصول الأربعة ...

مارسمت إلا فصل واحد ...

عشان الورد .. عشان الطيور .. والألوان



يا ليتني طفلة ...

أتكلم بكل شي أبيه ..

ولا أحسب حق احد حساب ...

ولا اعرف شنو الهم ...

شنو الغدر ...

شنو النفاق !!

ولا ادري شنو نشتاق ..

ولا ادري شنو الغياب


واستغرب إذا شفت أمي واهي اتصلي


يبلل دمعها المحراب



يا ليتني طفلة ...

أشوف الناس فرحانة ...

أشوفهم كلهم طيبين ...

أحب أهلي .. وأصحابي ..
مدرستي .. وجيراني ...

أشوفهم كلهم صادقين ...

وحتى يوم تزاعلنا ...

وحتى يوم يأذوني ..

تمر اللحظة وتنسيني

وأرد أضحك ...

ونرد نلعب


بماي .. وطين

35 comments:

qesat_5ayal said...

روعة
بقدر ما تمنيت هذه الطفولة

روعة
بمعنى الاحساس الذي شعرنا به

رغم أننا لم نذق تلك الطفولة بتلك الصورة
كانت مختلفة لكنها جميلة

وبجمال تصويراتك
كان لنا جمال الحلم


سلم لنا قلمك

(روح) said...

مازلتِ طفلة


عيشيها كيفما شئت :)


لاتزهقي روح تلك الطفلة
في داخلك

لازال العمر ينتظرك
يفرش الورد بإنتظار
خطواتك :)


وفقكِ المولى صغيرتي

Barrak said...

انا مع روح

charisma said...

الله يا نجمه
ايي والله يا ليتنى طفله


واذا اسبوع ما زرته

أزعل وأشيل الدنيا ...

ولا أفهم شنو يعني

ظروف ودنيا تدور


احلى شى بالطفوله

تسلم ايدج
رووعه

بـابـل said...

مسااء الورد والطفولة والبراءة


ذكرتيني بشعر كاتبه من زمان عن الحنين للطفولة

صراحة كلمات عبرت وأختصرت كل مشاعر الحنين للطفولة والبراءة

بس خسارة اللي يروح مايرجع

وهذا قانون الحياة


تسسلمين مليون مرة على هالمتعة الروووعة


وبس



بابل

Selezya said...

الله

لا تحاتين ترا للحينج طفله .. والدنيا الحلوة عيشيها انتي بطفولة
:)
مبدعه حبيبتي

ReLaaaX said...

والله اخنقتني العبره :/


بروحي مريييييييييييييييضة تسلطت على روحي


يالله الحمدلله ... بس عجييييييييييييييييييييييييييييييييييييييييييييييييييييييب



انتي صج نجمة

SolaimaN said...

:(

وايد اسمع هالكلمه انه كل انسان داخله طفل

بس انا لا ،، ما احس بهالشي

احس داخلي مدرسه وروضه وحضانتين،،كل سنه تمر

احس انه تو الناس بعد انا صغير ،، صار عمري

مليونين وليه الحين ابي زود ما شبعت !! ؟

مادري ليش؟

هل نبي نتخلص من اشياء سلبيه حصلت لنا بالماضي

او نبي الهروب من الواقع اللي متعومس

او ،،او،، او

بس الاكيد انه احنا ندور على السعاده

صج صج صج ،، يا ليتني طفل

Najmah said...

قصة خيال
الروعة وجودج
والروعة تعليقج
والأروح حرفج الدافي
ربي يسلمج ويخليج :)


روح
عيشيها كيفما شئت
اسعدتني عبارتج
اشكرج على ردج المريح
ويوفقج يارب :)


براك
شكرا :)


كاريزما
آخ ياكاريزما صدقتي والله
ربي يسلمج ويخليج والاروع وجودج يالغاليه


بابل
فعلا هذا قانون الحياة
اللي يروح مايرجع تبقى ذكراه
يشرفني انها امتعتكم
والاروع كلماتكم .. شكرا :)


سيليزيا
تعجبني ردودج اللي تعطيني تفاؤل كبير :)
اشكرج يالغاليه سوسو


ريلاكس
لا اسم الله عليج حبيبتي :(
سلامتج ماتشوفين شر اجر وعافيه يااارب
ربي يريحج دنيا وآخرة يالغاليه
وانتي صج نور هالنجمة :)


سليمان
احس داخلي مدرسه وروضه وحضانتين،،كل سنه تمر
وقفتني هالعبارة .. مادري حيل أثرت فيني

بس الأكيد ندور على السعادة
صح كلامكـ
وكل ماكبرنا تكتشف اشياء نتمنى لو ماعرفناها

العمر كله بالافراح يااارب

Sn3a said...

يا ليتني طفلة ...

أزور البحر كل اسبوع ...

يعلقني أبوي على جتفه ...

ويسبح فيني ... وأقول له يغوص ..

وبعدها نيمّع الأصداف ...

ونبني بالرمل القصور ...




صارلي فتره طويله عايشه بالماضي
هالبوست زادني اكثر واكثر
خصوصا من بعد مازرت بيتنا القديم اللي حضني باحلى ايام عمري وشفته فاضي الا ان ارواحنا للحين متعلقه فيه

نزلت دمعتي مادري ليش

يسلمو نجمه عالبوست الحلو

Nora said...

:")
اه يا نجمة
لعبتي بحسبتي والله

كلمات صادقة و واقعية

شنو النفاق و الهم و الغدر
احاسيس عرفتها غصب
.
.
و يبقى القلب طفل
لانه ما يقدر يتغير
:)

ياقلبي ابتسم said...

ياليتني طفله

اجمل مافي الطفوله
مرحله من غير هم
كنا دايم نبتسم

الكل وده يرجع طفل

وانا معك
بس للاسف انها امنيه ماتحقق

بوست يجنن

ماقصرتي

magnoonah said...

انتي اصلا طفله

ومو اي طفله انتي ملاك صغير بين البشر



لج وحشه وانا فاقدتج حييل

حبيت امر عليج
:**

Aldenya said...

كلماتج لامست قلبي
وأثرت فيه حيل

ياليتني
اي والله ياليتني طفلة

أشياء كثيرة ماكنا نعيها
كنا نقابلها بإبتسامة
ويوم كبرنا
فهمنا
و وعرفنا
وتمنينا إنا ما وعينا

يسلم لنا قلمج وقلبج يا نجمة
مبدعة

nadeyah said...

لازلتى استمتعى بكل لحظه طالما كتبتى هالحروف الرائعه ... احتفظى بالطفله لا تكبر وعيشيها بكل لحظه

Najmah said...
This comment has been removed by the author.
Najmah said...
This comment has been removed by the author.
Najmah said...

سنعة
احس فيج
اعرف الشعور لما نعيش بالماضي :(
ولما نشتاق حق الاشياء اللي نحبها فيه ونلقاها تغيرت
هذي الدنياا
عيشي يومج واتمنى تكون ايامج الياية احلى
عسى ربي يسعدج بكل لحظاتج
واعتذر على انزال دمعتج
نورتي والله


أحلى انج
ياهلا وغلا والله
اسم الله عليج :(

صدقتي..عرفناها غصب

ذكرتيني بكلمات احبها:
كبرت وزادت همومي واحس ان الزمن ضدي
كبرت ونظرة الطفلة تعيش بداخلي فطرة
كبرت وعشت هالدنيا كبرت ولا هو بيدي
كبرت بشكلي ورسمي وقلبي باقي بصغره

نورني وجودج :)


ياقلبي ابتسم
اي والله صح كلامج
كنا بمرحلة مو حاسين بحلاوتها
تسلمين يالغاليه
لا خلا ولا عدم


مجنونة
توووو مانوور المكان والله
لج وحشة اكثر يالغاااليه
لا تخلييييينااا


الدنيا
لأن قلبج صغير ورهيف يالدنيا
اي والله .. كنا متشوقين نكبر ونعرف كل شي .. ماندري ان بعدين بنتمنى لو ماعرفنا
ربي يسلمج ويخلييج يااحلى دنيا
وعسى دنياج كلها افراح
:*


نيدية
أول شي نورتيني بوجودج :)
ان شاء الله .. لكن اللي راح مايرجع
ونحاول نعيش اللحظة ونستمتع فيها :)
ربي يسعدج

بعثرة مشاعر said...

ياحلو أيام الطفولة
و ياحلونا و احنا صغار
:')

Anonymous said...

الــــــــــلــــــــــــــه


روع مالها حدود

بالفعل استمتعت بها البيات

esTeKaNa said...

ما زال في داخل كل منا طفله
تظهر في اوقات ما
تضحك بجنون
وتحب دون حدود
وتتكلم بصوت عالي
وتنسى نفسها أحيانا كثيرة
تخبو
نخفيها
نميتها في داخلنا ولكنا موجوده
طفله جميله متجدده في كل حين
:)
بوست جميل
طفولي
ينبض حب وبراءه
تسلم ايدج
:*

فتى الجبل said...

ما يمنع انج أحيانا تعيشين حياة الأطفال
على الأقل حياتهم أصفى وأنقى وايد من حياة الكبار

Kuw_Son said...

كلمات جميلة بألوان زاهية ..

الصورة أكثر من رائعة و ملائمة لجو الكلمات :)

dalal said...

قسما بالله نزلت دمعتي لما وصلت عند

" يلاعبني ظفر أمي ...

يغني لي قبل نومي ...

ولا شكيت بليلي البرودة ...

اندثرت أتدفى بحضنها "

مشكره على هالكلمات المؤثرة

تحياتي

إيلاف said...

يا الله يا الله ,

أي شجونٍ وشجون تلك التي أثرتيها في نفسي ! فعلا يا ليتني مازلت طفلة : )

كم أغبط الأطفال على طفولتهم , وكم أغبط روحكِ التي ما زالت ترتدي فستانًا طفوليًا بلونِ الزهور

5roofa said...

حبيبتي نجمه كلماتج قمه في الروعه

والله تي عرات لي شفت بناتي بالمدرسه كل وحده فيهم تمثل الكبر
ودي اقولهم ليش مستعيلين مردك لي كبرتو بتقولون ليش ما عشت طفولتي

تصدقين احس اول ايام الطفوله لي صارت مشكله او حزن في قلب الطفل سيده يركض لي حضن امه و ابو
بس مادري ليش بي كبرنا نلجا لكل شي بس نلهى عن هالحضن الي يشيل كل الهم الي فينا

تسلمين على كلماتج في بلوقي يالغاليه ما انحرم منها يارب

thanks alot sweete...

Anonymous said...


نجمة تكتبين بـ روح حلوة تجمع البساطة والعفوية ..

على الطفولة ... لا ما نبي نرجع أطفال
نظل شباب وايد أحسن ..لا نرجع أطفال
ولا نكبر ونصير عيايز :p

نور الوجود

ezain_kilah said...

واي يا نجومة! بالضبط هذي حالي أمس قبل لا أكتب

هالبوست

ملاحظة: مو تحسبيني قاعدة أدلل على مدونتي! لول بس من صج حسيت إن المواضيع مرتبطة

SHAHAD said...

يا ليتني طفلة

بصراحه الكلمات فعلا روعة من تشبيهات من ابداعات
كانت لوحة رسمها فنان :)
استمتعت جدا فيها
مشكورة حيل

Anonymous said...

كم تمنينا ونظل نتمنى
وتبقى كلماتنا تسقي آخر رمق فينا

Najmah said...

بعثرة مشاعري
ياهلا وغلا والله
اي والله صدقتي
وياحلو وجودج الغالي :)


ابو شملان
تسلم والله
يشرفني وجودكم واستمتاعكم
حياك الله :)


استكانة
دايما تعليقج غير :*
احب كلامج :)
الله يسلمج يالغاليه
لا خلا ولا عدم :)


فتى الجبل
واايد أصفى
واايد أنقى
حياك الله :)


Kuw_Son
صج الصورة حيل عجبتني وأثرت فيني :)
شكرا جزيلا


دلال
عورتي قلبي والله
عسى دموعج ماتنزل الا بالفرح يارب :*


إيلاف
كلماتي ماتوصل حق تأثير كلماتج ;)
أسعدني وجودج يالغالية
لا تحرمينا


خروووفة
ايييي والله حتى انا لما اشوف جذي ودي اقولهم لا تكبرووون والله حياتكم جذي احلى
ايي صدقتي والله
مع انا ندري مافي قلوب بتوسعنا وماتتخلى عنا كثرهم
عسى الله يخليهم لنا
وماسويت شي عزيزة وغاااليه
اتمنى ان السعادة سكنت قلبج وماتفارقه يارب :*


نور الوجود
تسلمين حبيبتي
لاا انا عندي الطفولة احلى :)
عسى ربي يسعدج بكل لحظاتج :)


الزين كله
فعلا المشاعر متشابهة :)
افا عليييج شدعوه المكان مكانج :)


شهد
انتي الأروع يالغالية
والله يشرفني اعجابج
تسلمين والله لا يخلينا منج :*


الأثير
اييي ونظل نتمنى
ونظل نتمنى
ونظل نتمنى
مع ان الزمن مستحيل يرجع فينا
نورتي :*

الوجد said...

كلمات اكثر من رائعه


احسست بالحنين الى الطفوله

من خلال هذه الكلمات الجميله


والاحاسيس الصادقه

Najmah said...

الوجد

وجودج الاروع غاليتي

ربي يسعد كل ايامج :)

magnoonah said...

حبيت اقول صباح الخير نونو

:)

وينج؟

Najmah said...

صباح النور والسرور

والفرح واحلى العطور

صباحج سعادة يالغلا :*