Friday, February 8, 2008

الشوق يرجعنا

باااااااااااااك
انا ردييييت : )

شلوووونكم؟؟ ولهاااااااانة عليكم وااااايد

الحمدلله كانت سفرة حلوة ممتعة مليئة بالمواقف والاكشنات =)))

حبيتها وايد .. خاصة انها كانت جماعية .. انا احب اليمعة بالسفر

كانت معانا يدتي و3 من خوالي .. ويمكن هالشي خلاني ما أمل بسرعة وأحن يالله ردوني الكويت : )

عندي سوالف واايد .. تصدقون هناك يتني وايد لحظات اشتهي اكتب بوست بس مايحصل لي

المهم .. خل ابدي معاكم من البداية .. اليوم اللي سافرت فيه

أول مارحنا المطار .. كانوا يدي وخوالي الباجي موصلينا ..

اللحظة اللي أثرت فيني حيل .. لما شفت الدمعة بعيون يدي واهوا يسلم على يدتي

قلبي فز لحظتها .. ورحت أسلم عليه جان يلمني ويقول لي ديري بالج على نفسج ويمسح دمعته بطرف غترته

وقعد يطالع يدتي ويدعيلها

حيل أثر فيني هالموقف ..حسيت ان هذا اهوا الحب الحقيقي

تذكرت شلون طول الوقت يتناجرون .. وكل واحد يتحلطم على الثاني
عمرهم مانادوا بعض بكلمات تعبر عن الحب

عمرهم ما اعرفوا المسجات .. ومكالمات تالي الليل ولا المطاعم .. والطلعات والتمشي على البحر

لكن بداخلهم .. قلوب تشيل من الحب جيال

دليلهم أفعالهم مو المظاهر والكلام

بداخلهم روح تسند اللي يحتاج السند .. ونفوس تنكسر لكن ظاهرها القوة
المهم
بعد ماخلصت لحظات الوداع .. دخلنا وكملنا الاجراءات .. وبعدها واحنا قاعدين نتريق

جان يدق خالي على يدتي يبيها تعلمه طريقة مرق السمج .. وتخيلوا ان المكان هدووء والساعة 8 الصبح

ويدتي ماشاء الله عليها سمعت المطار كله وتشرح كل شي بالتفصيل .. والانظار كلها متوجهة علينا

واحنا لووووول لا تعليق ^_^

بعد ماخلصنا وركبنا الطيارة اهني بدت لحظات الرعب بالنسبة حقي

الله يسلمكم كنت قبل يومين قارية قصة الطيارتين اللي ادعموا بعض

وشلون الناس قاموا يطيرون بالهوا وماتوا

مت من البجي صج حسيت بخررعة مو طبيعية .. ومن أول ماركبت الطيارة وانا

ميتة من الخوف وأقول كل الاذكار والادعية اللي اعرفهم والدموع بعيوني

وأقول بقلبي انا طول عمري اتمنى اني أطير .. يمكن تتحقق امنيتي ويصير فيني نفسهم

وطبعا الافكار لعبت فيني لعب .. توديني واتييبني

وقعدت اتخيل اني خلاص الحين بلحظاتي الأخيرة

وتذكرت بوقتها كل الاشياء الغلط اللي سويتها ونسيتها

والمواقف اللي ندمت عليها

والناس اللي صاحبتهم وعاشرتهم

قعدت استغفر ومن داخلي شي يحترق شلون راح اقابل ربي؟

وشنو راح اترك بعدي؟

تخيلت إن الحين خلاص روحي بدت تطلع من جسمي

قمت انتفض وانا اقول يارب راح تطلع بسهولة ولا بصعوبة وألم : (

وبعد ما تطلع روحي ... وأول مايوصل خبر موتي .. ياترى شنو راح يصير؟


أمي .. شلون بتتحمل صدمتي؟

شلون بتفارق قطعة من قلبها؟ وأول فرحة دخلت حياتها؟

راح تبجي عيونها دم من الحزن .. راح ينزف قلبها ألم محد يتحمله

راح تفقدني بكل ساعة .. وكل دقيقة وكل ثانية

أكثر انسانة بهالدنيا راح تحس بألم فراقي .. أمي :*

أبوي .. ياترى شلون بيتعود على فراقي؟

شلون راح يمر يومه بدون أسئلتي .. وحنّتي .. ونقاشاتي الطويلة

راح يمر عند داري كل يوم الفير .. لكن ماراح يطق بابها

راح يظل يكتب الشعر .. لكن ماراح يدز لي اللي يكتبه

شلون يفقد روح تشيل من صفاته اشياء وايد؟!

اختي .. اكيد راح تفقد اختها الوحيدة

راح تشتاق لي وايد

حق ضحكنا وهواشنا وخططنا و تحلطمنا

منو راح يسمع سوالفها ومواقفها ويطفرها بدراستها وبرفيجاتها

منو راح تاخذ منه كل جنطة تعجبها؟ وراح يعصب عليها كل ما فتحت ادراجه بدون استئذان؟

أخوي .. راح يفقد وجودي حيل

راح يفقد اللي تناجره كل ماقعد مكانها على طاولة الطعام

راح يفقد اللي ترتب أغراضه .. وتختار له ملابسه .. وتشفع له عند أمه و أبوه

راح يفقد اللي تسأله كل يوم: شكثر تحبني؟!



أخوي الصغير .. انا راح اشتاق له أكثر : (

راح يفقد اللي تلمه كل يوم لما يقولها خلااااص وخري

راح يفقد اللي تلعب معاه وترجع طفلة واهيا تركض معاه بكل البيت

راح يفقد اللي تطفره وتعيد وراه كل كلمة يقولها

راح يدخل داري وينثر كل اغراضي .. بس ماراح يلقى اللي تطلع له تزفه وبعدها ترجع تلمه

اختي اللي ماولدتها أمي .. رفيجتي وحبيبتي الغالية

راح تكمل طريجها .. بس هالمرة بدوني

ماراح يكون فراق رفيجة طفولتها وصباها سهل عليها

راح تذكرني بكل الصور وكل المواقف وكل الايام

راح تحفظ السنين اللي عشناها بقلبها

وراح تدمع عينها وتدعيلي .. كل ماشافت نجمة بالسما تبرق

أهلي كلهم ..
رفيجاتي ..
بنات الجامعة ...
البلوقر

كل انسان اعرفه مرّ على بالي وقكرت بردة فعله

وكل ماذكرت شخص دعيت من قلبي اني ما اكون مضايقته ومايكون شايل بقلبه عليي

صج احيانا نسوي اشياء بدون مانحس فيها

ننساها .. لكن سبحان الله مجرد احساسنا ان راح نرووح نتذكر كل هالاشياء


أكيد بتقولون شنو هذا ردت وكدرتنا لو مو رادة احسن : )

بس صج يوم مريت بهالشعور حسيت خلاص لازم نوقف وقفة صغيرة نعتبر فيها

و انا تعبت الحين والله ماتوقعت راح اكتب هالكثر بس لما الحين ماخلصت فيني كلام شكثره
رادتلكم اذا ربي احيانا مع بوست ببعض السوالف اللي صارت هناك

الى اللقاااء

21 comments:

Q80 Blogger said...

ولكم بااااك
وحمدلله على السلامة

بس نجمه .. كل هل شعور على سفره قصيره
مو زين تسافرين كلش :)

المنتدى الشبابي لمؤتمر الحريّة طريقُ الرّيادة said...

حياكم الله في مدونة المنتدى الشبابي الثالث, لمؤتمر شركة الإبداع الأسرية
الحرية طريق الريادة
http://q8muntada.blogspot.com/

علماً بأن المؤتمر بقيادة: أ.بثينة الإبراهيم, وإشراف د.طارق السويدان

وتنظيم مركز مرتقى للتدريب القيادي للفتيات, ومركز الرواد للتدريب القيادي

الى جانب صناع الحياة’ ودرر

magnoonah said...

نجموووووووووووه
اولا حمدلله على السلامه

تدرين والله يايه من مدونتي ركضه بقيت اتزحلق واطيح عند بوستج من الفرحه

مو مصدقه انج رجعتي
وقعدت اضحك على سالفة يدتج

بس الحين والله قلبي يعورني
الله يهداج بس
هذا كلام من صجج انتي
مو عن نكدتي بس والله دام تعرفين نفسج غاليه ليش تقولين جذي

شوفي هذي اخر مره
فاهمه
ولا والله اسويلج كرت احمر وماكو سفر بعد اليوم

((عصبت))
وانا اقول خل تستانس وراها هم الدراسه ما بقى عليه شي

((تتحلطم))

:***
حبيتي انتي لج وحشه
وانا سعيده انج رجعتي وناطره البوست الياي

:))

وعسى ربي يطول بعمرج ويفرحني بتخرجج ويبلغني فيج عروس

اللهم امين
:)

darkness said...

الحمد لله على السلامه

و الله يخليلج اميمتج و ابيج

و يدتج و يدج

و ما تفقدين غالي

و تعوذي من بليس شهالافكار؟؟


صج صج فقدناج من غير شر

:)

Najmah said...

كويتي بلوقر
الله يسلمك :)
لوووول
خلاص خلاص مانسافر :))
والله يردك بالسلامة يارب



المنتدى الشبابي
يعطيكم العافيه ويبارك فيكم
يزاك الله خير



مجنوونة
الله يسلمج بعد قلبي
لووووول اسم الله عليييج اطييح بدالج :))
خلاص انا آسفة ومرة ثانية مااعيدها رضيتي؟ :))
كلش ولا انتي عاد عين السيح :**

تسلمين لي والله يابعد كل غالي
:**
واجمعييييييين يارب :))



داركنس
اهليييييين
الله يسلمج حبيبتي
ويخلي لج احبابج يارب
انتي اللي فقدتج والله
توني ياية ازورج واقول بقلي وينها عسى ماشر
الله لا يخلينا :**

بـابـل said...

هلا نجمة

حمدلله على سلامتك

يحليل يدتك ويدك والله صج هذا الحب والا بلاش مو مثل ألحين



وقصة خوفك من الطيارة

هذى صحوة ضمير

والحمدلله أنك راجعتى كل شريط حياتك

ومااعتقد ان في انسان من اللي حواليك زعلان او متضايق منك

لأنك طيبة حيل

وكل القلوب تدعيلك



تحياتى



وبس


بابل

مستقلة كويتية said...

حمد لله على السلامة

وأسجل اعجابي بكثير من بلوقاتج

bu saad said...

هههههههههههههه
حسبي الله على ابليسج حدج فلمجيه!!!

وعلى طاري يدج و يدتج يا هذا الحب يا بلاش!!


على العموم الف الحمد لله على السلامه

هـــدب said...

اشلونج نجمه
الحمد لله على السلامه
والكويت منوره
ونبي بوست تعويضي عن الايام اللي طافت
وناطرين السوالف والاكشنات
وتحياتي لج

78o8eYa said...

:"(

بجيتيني
..
!
وسيّحتي الكحله بعيني
الله يسامحج
...
:$$

الحمدالله على سلامتج حياتي
ربي يحفظج و يخليج لحبايب دنياج
ولا يحرمهم من نورج

اسم الله عليج


لا تخرعينا مره ثانية
..
آنا متعودة أقرا عندج حجي يخليني أطير عند النجوم

ناطره بوست تعويضي
:S

Najmah said...

بابل
الله يسلمك ان شاء الله
يزاك الله خير
اللهم اجلعني خيرا مما يظنون واغفر لي مالا يعلمون
الله لا يحرمني من هالقلوب الطيبة
شكرا جزيلا بابل



مستقلة كويتية
الله يسلمج حبيبتي
شرفتيني ونورتيني والله :)



بو سعد
لوووول عيل طلعت فلمجية :P
:))
الله يسلمك من كل شر
وشكراا :)



هدب
ياهلا وغلا والله
انا بخير عساج بخير
الله يسلمج حبيبتي والكويت منورة بوجودج
ان شاء الله تامرون :)



حقوقية
افااا :(
ماعاش اللي يبجيج ويسيح كحلتج يالغاليه
سامحيييني والله مو القصد
واوعدج بتعويض يضحكج ويوصلج النجوم :)
الله يسلمج بعد قلبي
وربي يخليج لأحبابج وينور دربج بالافراح :*

الزين said...

welcome back

:**

Najmah said...

تسلمين لي ياكل الزين
:**

Fahad Al Askr said...

انت مسافرة إلا رايحة حرب؟

Najmah said...

لوووووول
حرب مرة وحدة
:P
لا انا ويني ووين الحرب
مسالمة والله
:)

ولد الديرة said...

الحمد لله على السلامة

اليد الله يحفظه يلبس عدسات
؟

:P

Najmah said...

الله يسلمك
:)

لووول لاا
ليش
؟
:"))

Eng_Q8 said...

الحمدلله على السلامه

7osen said...

الحمدلله على السلامة

إن شاءالله تكونين أستانستي


والله يخليج حق أهلج

صراحه خيالج ودااج بعييد
لا تفكرين جذي


بوست حلو وايد

Najmah said...

مهندس الكويت :)
الله يسلمك
وانت بعد الحمدلله على سلامتك :)



حسين
هلا والله
الله يسلمك يارب والحمدلله استانست :)
وعسى ربي يخليك لأهلك وكل احبابك
ايي والله مشكله اللي خيالهم واسع صح :)
تسلم ياحسين :)

Anonymous said...

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室