Sunday, May 11, 2008

اسبوع مختلف



السبت

..
أحاول جاهدة كسر الروتين المتكرر
..
أنهمك في تحليل مواقف ماضية .. وتوقعات مستقبلية
..
وانتهي بقرار حازم
..
سيكون الاسبوع مختلفا
..
سأتحرر من قيود فرضها الآخرين
..
وتنازلات لا مبرر لها
..
وتراكمات من هموم ماضٍ غابر
..

سأحيا فيه الشروق فقط
!


.
.

الأحد
..
تتوالى الاتصالات على هاتفي
..
تنهمر الرسائل
..
البعض منها يؤنسني
..
والبعض يزعجني بتفوق مصالحه
..
والبعض الآخر .. يصنع مني مطرا يحيي الأرض الميتة
..
أفرح بمؤنسها
..
وأتجاوز سيئها
..
ولا أملك للباقي .. سوى غيمة حب تحتويهم

.
.

الأثنين
..
ألعب دور الأمومة مبكرا .. لظروف غياب أمي
..
أوصتني أمي كثيرا على أخي (آخر العنقود)
..
أسمع منه كلمة " ماما " فتختلط فيني الضحكة والعبرة
..
كان ممتعا .. غريبا .. ومتعبا الشيء الكثير
..
لكني ببساطة .. طبقت مبدأ اللا قانون
;P
.
.

الثلاثاء
..
تعانق عيني صفحات مياه البحر
..
أقرأ حروفها
..
أبحث في غموضها
..
وأنغمس في سعة روحها
..
تتحدث صديقتي
..
ويبعثر صمتي كلماتها
..
كانت مشحونة حد الانفجار
..
وكنت هادئة حد السكون
..
وكان البحر كفيلا لجمع تناقضاتنا


.
.

الأربعاء
..
أسير بخطى متثاقلة نحو قاعة المحاضرات
..
يفاجئني وجه لا أجهل ابتسامته
..
كان سلامنا طويلا .. كطول الفترة التي فصلتنا
..
3 سنوات مضت
..
كانت كفيلة أن تمحي زمن اللقاء
..
وكفيلة أيضا أن تحفظ الذكريات
..
لا زالت كما عهدتها .. روح تنبض بالخير
..
تسأل عن الجميع .. وتبتسم للجميع
..
نادرة مثل تلك القلوب البيضاء .. لا تصدأ باختلاف الزمن

.
.

الخمبس
..
أتوسط مجموعة من أقاربي
..
نشترك في الضحكات المتصاعدة
..
الاحاديث المتنوعة
..
وفي غمرة تفاعلاتي
..
أشعر بوخز الشوق في قلبي
..
اشتياق مختلف
..
لمدونتي الصغيرة
..
ولكم أنتم
,,
ذلك الاشتياق المجرد عن الدواعي والأسباب
..
اشتياق لا يبعث سوى الدفء
..
ولا يولد فينا ..سوى الحب
.
.

الجمعة
..
ترمقني بنظرة غريبة وأنا اهمس
"تصدقين .. اشتقت للجنون "
..
وتتلاشى تساؤلاتها حين أكمل
..
" يعني أحس بالراحة .. ولا شي مقيدني
أسوي اللي يرضيني .. بدون ما أحسب حق غيري ألف حساب"
..
وما إن أكملت عبارتي .. حتى سمعت صراخ أطفالها
..
ذهبت لأقتحم غرفتهم .. شاركتهم اللعب
..
تقاذفنا الوسائد .. وقفزنا فوق الأسرة
..
نظرت إلي وهي تبتسم وتقول
" كان عندي 3 أطفال شكلهم صاروا 4 "
:P

.
.

السبت
..
لا زلت حااائرة
فجأة قررت أتخرج بـ 3 سنين ونص
وسجلت 4 مواد صيفي عشان أتخرج الكورس الاول
وايد ناس قاعدين يقولون لي ان وايد :\
آنا مادري أحس محتارة
أهلي يقولون لي تخرجي وكملي دراستج
وآنا أحس أبي أتخرج بس أبي أرتاح
تعبت من الدراسة :\
شرااايكم؟

29 comments:

QiYaDiYa said...

اسبوع طويل !!

بس برد على النقطة الاخيرة !

لما سألت ابوي هالسؤال ..
اخذ صيفي ولا ما اخذ ؟

قالي اخذي ..
انتي تشوفينها صعبة ..
بس اهي شهر و نص بسرعة بتمر ..
اول اسبوع راح ..
و اخر اسبوع راح !
يعني عندج بس شهر سبعة !

ضغطي على عمرج !

لان اذا ما خذيتي صيفي بتقولين حسافة جان زين خذيت صيفي !


وبعدين هالسنة عطلتنا طويلة لي شهر 10

شتقعدين تسوين 4 اشهر !

و بعدين عشان ما اقعد بالصيفي بروحي ازريني ;p

و هم عشان نتخرج مع بعض ان شاء الله ;p


استخيري ..

و اخذي براي امج و ابوج !

و رايي انا ;p


موفقة ;)

صبا said...

اهلين نجمه

بوست منوع وايد حلو كل يوم غير
بعيد عن الروتين
الي شدني ووقفني

يوم الاثنين
..
ألعب دور الأمومة مبكرا .. لظروف غياب أمي
..
أوصتني أمي كثيرا على أخي (آخر العنقود)
..
أسمع منه كلمة " ماما " فتختلط فيني الضحكة والعبرة
..
كان ممتعا .. غريبا .. ومتعبا الشيء الكثير
..
لكني ببساطة .. طبقت مبدأ اللا قانون

كلمة مــــامــــا
احلي شعور احلي احساس واحس اني طايره اذا سمعتها ابيع الي جدامي والي وراي بس اسمعها

كل شي بالدنيا حققته الا هالشعور وانشالله يتحقق
بس اذا حققته راح اطلع من المدونات لانه راح ياخذ وقتي وقلبي وروحي

والله يوفقج وتتخرجين وتحققين طموحج
شدي حيلج
:***

مصعب said...

بعيدا عن السؤال الاخير
لا اعرف كيف كان اسبوعج بالضبط ولكن وصفج له اروع من الرائع.. كلمات اعجبتني

اتوقع انك تمتلكين عقلا يفوق سنك بمراحل
اما بخصوص السؤال، فلا اعلم عن الفتيات ولكني اذكر اني تخرجت من الجامعه وجلست في البيت سنتين بلا وظيفة وكانت من اروع سنين حياتي، النوم حسب الرغبة والقرآءة حسب الرغبة والبرنامج حسب الرغبة لا سلطان غير سلطان الفراغ
حتى اتت ايام الوظيف وكلي نشاط وحيوية مفعمه ومتشوقه للعمل
انصحك بمثل ما عملت
وحاولي التخرج باسرع وقت لأن الدراسة في الكويت شر لابد منه يجب ان ينتهي باسرع وق:))
وتمنياتي لك بدوام الصحة

Anonymous said...

تري نجوم الكلمة يطالعونهم الدكاتره بدربيل
رايي اتخلصين بسرعة عشان اتفرغين لمواصلة الطريج إلى كتاباتج العليا
مو شهاداتج العليا

الشهادات والتخصص والوظيفة والكرسي كلها طرق إعتياديه وتحصيل حاصل خاصة في ديرتنا
المميزين بالموهبة وفي الطريق الحر هم فقط اللي لهم فرصة نجاح حقيقي
لأن احنا بالفعل نعيش في عالم متخلف نسبيا للأسف
آنا ماأقولج لايقصون عليج لأن أغلب اللي حولنا منقص عليهم بسالفه المسميات الفارغه اللي نقضي فيها عمرنا بعدين نحس إنها ماحققت لنا ذاتنا بما يرضي
وخاصة وخاصة أصحاب الموهبه
احذري اتفرطين بالقلم أقصد قلمج في مقابل اي شي ثاني مهما كان عند الناس كبير اذا قدرتي اتوفقين زين على زين لكنها صعبة ترى
انتي في داخلج تدرين زين إنه ماكو شي بتطولينه أهم من اللي اهو بين اصابعج
اذا كان هالشي مو واضح الحين باجر يوضح تذكرين كلامي ان شاء الله
اقولج هالكلام بهالاهتمام
مو لأنج بس قدرتي اتعبرين عن يوم الأم الثانيه
لكن لانج قدرتي اتلحقين وراه بالتعبير عن يوم الطفلة الرابعة
اهني ضعف التميز واهني تأكيد الابداع
هالسهل الممتنع المؤثر الممتع اللي تكتبينه تراه مجرد قليل من بدايات الموهوبين اللي تطفح بسهولة لكن من تحته منجم يانجمه إذا أصريتي إتنقبين فيه بجد وثقة راح إتلاقين مو بس النجاح جدام الناس لكن الاهم النجاح بينج وبين نفسج والرضى عنها وتحقيق الذات وهذا الأهم
وماشاء الله وعسى الله يحفظج من العين
jasem

بـابـل said...

صباح الورد

نجمة شلونك...؟

ماشاء الله عليك تسوين أشياء وايد بالأسبوع

وعايشه كل يوم بيومه

حبيت بس أقول الله يخليك لآخر العنقود


وتسلمين يانجمة


كل شي تكتبينه حلو


وبس



بابل

7osen said...

حلو البوست

ممتع

نجمة متألقة

أتمنالج كل التوفيق

:)

صقر قريش said...

رائعة كالعادة ووصف أ:كثر من رائع لأيام الأسبوع عندكِ حفظ الله لكم أخيكم اسأل الله أن يكون لكم قرة عين بإذن الله.

عن السؤال الأخير:

بصراحة التخرج حلو بس هم برواء هو صح شهر وخلاص لكن أربعة ضغط كبير بالنسبة لي هذا تخرجي بأربع سنين ترى صدقيني إذا أشتغلتي راح تحنين حق أيام الدراسة هذا طبعا غير النطرة آنا هذا رايي الله يوفقج إن شالله وتتخرجين بأعلى الدرجات إن شاء الله .

باغي الشهادة said...

بعد مدح الأسلوب ونعته بالجميل
:-)

أقول لك أنا أخذت صيفيين فقط وكلاهما أربع مواد اثناعشر وحدة، صح ضغط لكن عادي

توكلي على الله بعد الاستخارة

SolaimaN said...

راينا ،بشنو ؟السبت والا الاحد والا الثنين؟
:P
كلهم زينين،،وخصوصا دور الوالده الله يحفظها

اما عن التخرج،، اتصور انتي الادرى

هل المسأله تستحق العناء؟ انا اقول يسسسس

توكلي على الله

:)

5roofa said...

اسبووعج يوووسن في تغير لول لو انا جان كل يوم بتسولف عن المدرسة

الله يرد مج بالسلامة ياارب قدها و قدوود خيتوو

على الدرساة امبي تدرين معنه انا تاخرت كورس بس مو متحسفه

احلى اسام حياتي الجامعة و لو بيدي اردها من اول و يديد

لا تستعيلين فيها و اذا رفيجاتج بعد موجودين احلى الجامعة تصير

مادري احس انا جذي الوضع

بس موفقه بكل شي سويتي

salamz sis...

Aldenya said...

يااااااانجمه
باختصار

احب كتاباتج

ضميني لقائمة المعجبين :>

charisma said...

ماا شاااءالله يا نجمه اسبوع حاافل

:)

عساج على القوه حبيبتى

والله يوفقج يا احلى نجمه

:*

Sn3a said...

حلوة اليومياات
اخذي
خلصي وتخرجي
مالج شغل باحد
اذا انتي حاسه نفسج قادره
سجلي وتوكلي على الله

Najmah said...

قيادية
ياهلااااا بالصديقه الغاليه
تو مانور البلوق :))
والله أمي وابوي نفس راي ابوج ورايج :))
خلاص ولا يهمج لا آآزرج انا
ونااااسة عاد نتخرج
ونحتفل مع بعض
:)))
اجمعين حبيبتي
:*


.
.


صبا
اهلين حبيبتي
اييي صح كلامج شعور غير والله
عسى ربي يرزقج اللي تتمنينه
وتحسين بأحلى شعور تحبينه
:)
منورتني ياصبا :*


.
.


صالح للشعر
يسعدني اعجابك :)
والله انا حاطة ببالي اقعد كورس بعد التخرج .. ارتاح فيه واتفرغ فيه حق اشياء وايد .. عشان لما اشتغل ابدي بنشاط
بس سنتين وايد :)
احس كورس يكفي ان شاء الله لأن الدوام غير احسه ينظم الحياة :)
اجمعين يارب

Anonymous said...

الدراسة همّ ... تخلصي منه مبكرا

Najmah said...

جاسم
كلماتك وايد أثرت فيني
تطوير الكتابة أهم طموحاتي اللي أسعى لها
وفعلا اهيا من الأسباب اللي تدفعني أشد حيلي وأتخرج بسرعة
واكمال الدراسة ابدا مو عشان المسمى
لكن لأن كان هدف ووطموح أتمناه
حاليا حاطة آمالي أتخرج واقعد كورس افضى فيه حق نفسي وارتب حساباتي واقرر فيه تحديد طموحاتي
اشكرك جدا ياجاسم
كلماتك كان لها اثر كبير :)
اجمعين يارب


.
.


بابل
مساء النور والفرح
الحمدلله بخير :)
ويخلي لك كل غالي يارب
الله يسلمك يابابل
والف شكر لك



.
.

حسين
وجودكم الممتع ياحسين
شكراا جزيللا
ويوفقك بكل خطوة يارب


.
.

صقر قريش
اجمعيين اخوي
صح كلامك أيام الدراسة ماكو مثلها :)
انا صيفيين اخذت 3 مواد
والحمدلله كان الوضع عادي
بس مادري
الله يسهل ان شاء الله
واجمعين يارب
شكرا لك ياصقر

Najmah said...

باغي الشهادة
بعد شكركم الشكر اجزيل :)
ماشاء الله والله تفاءلت :)
ان شاء الله
يزاك الله خير

.
.


سليمان
لووول طبعا بالسبت :))
والنعم بالله
وشكراا على رفع المعنويااات :))


.
.


خروووفة
لووول انتي سوالفج اتينن استانس عليها :))
صح كلامج ايام الجامعة حلووة
استانسنا وايد وسوينا كل اللي نبيه
:)
ولاحظت شي
كل البنات لما يتخرجون يقولون لي لا تتخرجين :)
الله يكتب اللي فيه الخير
ومشكورة يا اغلى خروفة :*


.
.

Najmah said...

الدنياا
تدرييييين
شكثر وجودج يعني لي شي كبير
عيل شلون اعجاابج؟؟
:))
لا خلا ولا عدم يالغاليه :*


.
.


كريزما
يقويج ويوفقج يالغااالية
منور المكان فيج والله
:*


.
.


سنعة
الاحلى وجودج حبيبتي
ان شااء الله :))
مشكوورة وايد يالسنع كله :)


.
.


محسد
:))
افا ليش هم
والله احيانا هم لكن احيانا متعة :)
شكراا لك

Catism القطويّة said...

أسبوع حافل، شكرا على مشاركتنا فيه. :)

أما أمام الحيرة، فما لك إلا صلاة الاستخارة.

وإذا طلبت الاستشارة، فلا أستحسن 4 مواد في الصيف! استمتعي بالصيف وبالاستعداد لرمضان، ثم ابدئي فصل تخرجك نشيطة منتعشة. آخر فصل له طعم خاص وذكريات، وليس من اللطيف أن تتذكري الكد والكدح في الصيف.

وموفقة ;)

Najmah said...

القطوية
يا اهلا وسهلاا
:)
اسعدتني زيارتج اليوم
تسلمين على نصيحتج
لا ما اتخرج صيفي
اذا خذيت 4 مواد صيفي
اتخرج الكورس الاول :)
ان شاء الله راح استخير
وربي ييسر الخير
مشكورة اختي العزيزة
نورتي :)

esTeKaNa said...

السبت
~~~~~~
كوني حرة نفسك
انفضي غبار الهم
واشرقي من جديد
ليكون لك اسبوع آخر مختلف
!

الأحد
~~~~~
لم يكن االامر يوما له علاقه بكثرتهم
ولا بكثره اتصالهم ورسائلهم
الامر متعلق فقط بصدقهم
وبجمال روحهم التي دعتهم للتواصل معك
!
كوني استراحة الحب في حياتهم
ومحطة للخير لم ولن ينسونها مهما تعددت اغراضهم
:)


الأثنين
~~~~~~~
أجمل مبدأ للتعايش مع الاطفال
هو مبدأ الاقانون
!!
ميقنه بان داخل النجمة كنز من حنان
حفظ الله اخيك الصغير
ورد امك بسلامة يارب



الثلاثاء
~~~~~~~~~
حكمتي الداائمة في الحياة
ان للمتناقضات سر
يجعلها دائمة التعايش سويا
!!
صمتك وكلامها
هدوؤك وانفجارها
متعه التنقضات التي تجمعكم
:)




الأربعاء
~~~~~~~~~
ما ارق الصدف التي تجمعنا باصحاب القلوب البيضاء النادره
اشعر بانها صدفه ترد الروح
:)


الخميس
~~~~~~~
وخزة الشوق التي تجذبك وانتي في وسطهم
لا تكون الا لمن صدقتي في حبهم
وصدقو بالتفاعل معك
وهذا اقل ما تستحقه النجمة
:)




الجمعة
~~~~~~
لابد من لحظات جنون
وفصلات مالها حد
هل تشكين ان في داخل كل منا طفلة؟
:)




السبت
~~~~~~~
اين تنوين تكمله دراستك؟
اذا كنتي تنوين في الكويت فانتي في كل الاحوال ستظطرين لانتظار موعد قبولهم ستقلبلين مع دفعتج
!!
لما العجله وتضغطين على نفسج مقابل ماذا؟
استخيري
ولكن من تجربة لم يمر عليها الكثير
خذيي وقتك وتخرجي باربع سنوات بشكل طبيعي افضل
:))

U-Turn said...

أسبــوع حــافل !!

أسبــوع أحسست بالمتعــه وكأنني أعيــشه :]


بالنسبــه حق يــوم السبــت

رايي ...إذا ما وراج شي ليش ما تكمليين دراستج :)

شي حلو إنج تكملينها وأيام الدراسه ما تتعوض :]

وتسلم إييدج

Kuwait said...

امبييييييييه مو صج اكتب واكتب وفجأه ما يطلع ..
ببجي ..
لوووووووووووووووووووول ..
بس طنقرت ومخي وقف برووح أنام ..
حظي كلش مو مترقع اليوم ..
لوووووووووووووووووول..
بإختصار ..
تعجبني كتاباتج ..
أرى اسبوعي روتيني بينما أرى اسبوعكِ متجدد بكلماتك الرائعه ..
كتابات جميله من إنسانه أجمل تملك موهبه تفوق كلمات الوصف وتعابير الثناء وجمل المديح ..
بالنسبه للدراسه ..
مادام المجال مفتوح لتواصلي فلا تتوقفي ..
فمهما طال التعب فلا بد من وجود متسع من الوقت في حين وآخر للإسترخاء والراحه ..
الله يعطيج الف عافيه على كتاباتج المميزه ..
تقبلي مروري ..
kuwait

Anonymous said...

كـ الأسبايع هي الأيام
تحمل الغير متوقع دائماً
:)

كملي دراسة بس لا تستعجلين عشان الضغط النفسي
ترا الدراسة زينة تشغلج عن تفاهات البعض :)

~FaHaD iN MiND~ said...

na9e7tii estansay eb kel la7tha la7ga 3ala il ta5aroj .. a7la ayam il 3umr ayam il jam3a beleive me :) .. atmanalch il tawfeeg enshala :)

Najmah said...

estekana
1
تهقين سهله كل اسبوع يا استكانة؟
:)


2
كلماتج دايما حلوة لانها صادقة
:)


3
ايي احلى شي اني اخليهم يسوون كل شي على كيفهم .. بس المشكلة إن آنا راح آكلها
سهر على كيفهم وآخر شي غياب عن المدرسة
لعب وطلعة طول اليوم وبعدين آنا أحل واجباتهم =p
شفتي أم نفسي؟ :))


4
صح صح صح :)


5
اي والله ترد الروح
تعرفين لما تحسين انج مستنسة طول اليوم
لقاء 5 دقايق لكن ترك أثره باليوم كله :)


6
وهذا اقل شي تستحقونه
الله لا يخليني


7
تصدقين عاد اول شي تذكرته كلمتج
لما قلتيلي داخل كل منا طفل :)
بس المشكلة لما تعجبهم السالفة
وكل شوي يسحبون هالطفل اللي داخلج :))


8
صاير وضعي حاليا ما افكر بشي غير اني بقعد بالبيت ارتاح :)
احس محتاجة فترة نقاهة ارتب فيها حساباتي واموري وافكر عدل واخلص من اشياء وايد
وبعدين يصير خير
ان شاء الله بستخير والله يكتب الخير

شكرااا بقد حروف الدنيا يا استكانة

Najmah said...

u-turn
تصدقين مرات تكون ايامنا حافلة
بس مانحس فيها الا لما نكتب احداثها :)
..
مادري يمكن لأني حاليا أحس برتاح وبس :)
الله يكتب اللي فيه الخير
وربي يسلمج ويخليج حبيبتي

.
.

كوييييت
بعد قلبي والله
صج اكره هالشعور :\
بس كلش ولا تبجين وتنطقرين اسم الله علييج
ميخالف مسحيها بويهي : )
والله ماتصدقين شكثر ابتسم وافرح بكلماتج الحلوة
اعجابج ومديحج شرف لي ودافع كبير يشجعني
صح كلامج ان شاء الله اذا في خير لي ربي يسهله :)
ربي يعافيج ومشكوورة من كل قلبي ياكويت
:*

.
.

خالد
صدقت والله :)
ان شاء الله اذا ربي يسر
شكرا ياخالد

.
.

فهد
اجمعييين يارب
الف شكر على هالنصيحة
ودعواتكم : )

لؤلؤة said...

اسبوع حافل..وعسى كل أيامج خير

Najmah said...

ياهلا اختي اللؤلؤة
اجمعين يااارب
منورتني :)