Thursday, June 5, 2008

فضفضة

قبل مايقارب العشر سنوات .. اقتحمت فضاء الانترنت
كانت البداية .. ايميل ومسنجر
مواقع ألعاب .. مواقع قصص
ثم تطورت إلى دخول عالم المنتديات
..
المشاركة في كثير منهاا
والإشراف على بعضها
ومعرفة الكثير من الصداقات
.
.
وفي السنة الاخيرة .. وجدت نفسي في عالم التدوين
.
.
كنت أراه عالما واسعا لحرية التعبير
بعيدا عن صخب الواقع
وعن تطفل الآخرين
لكني اليوم .. بدأت أراه عالما مصغر لواقعنا
!
!
..
كنت أحاور صديقتي ذات ليلة.. فقالت"
" الكويت صغيرة بشكل مو طبيعي .. مهما حاولتي تختفين ماتقدرين
قتلها: المشكلة مو انها صغيرة ومانقدر نختفي .. المشكلة بالناس
قالت: المشكلة الناس وايد ملقوفة
!!
.
.
لماذا علينا أن نتخفى حتى نضمن نقاء مشاعرنا والنجاة من همهمات الآخرين
..
!
رغم ثقتنا الكبيرة بأنفسنا
رغم عدم ارتكابنا لخطأ يذكر
..
إلا أن ألسنة الناس لا ترحم
!
.
.
حتى أبسط مشاعرنا .. تسوّر بأسئلتهم المتعاقبة
..
لكل كلمة .. يبحثون عن تفسير
ولكل قصيدة .. يجب أن يكون سبب
ولكل شعور دافئ .. يجب ان يكون حبيب
!
!
منطق غريب ... والأغرب منه
..
أن تخدش سمعتنا .. من أشخاص عرفوا أخلاقنا قبل مدوناتنا
.
.
التدوين جزء من حقيقة الشخص .. وإن لم تكن الحقيقة كاملة
لكنها تكشف الكثير من أفكاره وجوانب شخصيته
وحتى معاملته مع الآخرين من حوله
.
.
أحيانا أشعر بأن أكثر الناس فهما لنجمة
من شاركوها التحليق في هذا الفضاء
وأقربهم احساسا بها .. من عرفتهم يوما في سمائها
.
.
كانت بدايتي في التدوين من أروع البدايات .. أحببتها كثيرا
..
وأفتقد اليوم ذلك الاحساس .. أفتقد النشوة التي كنت أكتب بها
..
أفتقد التحليق بالجناح الذي أختاره .. أفتقد الطيران متى أشاء .. والتوقف متى أردت
.
.
حين نتحمل أخطاء الآخرين على حساب أنفسنا
..
ونغتصب مشاعرنا عن أعينهم المتطفلة
..
لأنهم ببساطة .. عبثوا بألسنتهم بطهر أرواحنا
فلا حرية تكفلها لنا مدوناتنا
!
!
.
.
نقطة أخيرة
..
وانت المنى غير اني امرؤ .. يذلل للكبرياء المنى
اذا المرء هان على نفسه .. يكون على غيره أهونا

34 comments:

bu saad said...

أن تخدش سمعتنا .. من أشخاص عرفوا أخلاقنا قبل مدوناتنا


ما فهمت شتقصدين!!

2cool2care said...

قلتلج ذاك اليوم المشكلة ان الواحد يكتب احاسيسا وطلعها من قلبة ويجي واحد مايعرف الي شيئ بأحاسيس الآخرين وعلق عليج


انطلقي بجناحيكي فأن الرماي لا يستطيع ان يرميكي ان حلقتي عاليا فالسماء

charisma said...

فعلا مفهوم البلوق بعييد كل البعد عنا
الواحد يدش تحت اسم خفى يفضفض يقول يطلق العنان لخياله بس قيود المجتمع والعادات والتقاليد ورنا ورانا حتى بالبلوق لالازم تصيرين مقيده والالالالا
قالو فيج وما فيج
ويدش الفضول منو هذا ومنو هذا

وايد حاشنى احباط
انا شخصيا اختلفت 180 درجه عن اول ما دشيت هالمكان

وطمنينا على نتايجج
:**

بوست هذاك اول وايد عجبنى
علقت فيه

darkness said...

نجومه

انتي قلتيها اهم يعرفونج عدل

بس للاسف احنا رغم رفضنا للقيود اللي بواقعنا تلقين وايد من الرافضين لهذي القيود هم اول من يعاقبون الخارجين عنها

الاحساس بالشي لا يعني وجوده

افهمج

بس مو متقبله نبرة الانهزام اللي بصوتج

انتي تكتبين لها؟

لهذي الانسانه المريضه اللي تبي تحطج بخانة المخطئين؟

انتي بتنهزمين لها؟

بتخلينها تسيرج على ما تريد؟

انتي يا نجمه

انتي

مو اهي

انا احبج وايد و اعزج فوق ما تصورين

افهم انج انقى مما تتصورين انتي نفسج

برائتج ما يفهما الكثيرين

ما يكفي انج تدرين عن قصدج

افهم هالشي بمجتمعنا

بس هم ما ارضا ان احد يسيرج على ما اهو يبيه

بلوقج ملكج

و اختيارج الخاص

تكتبين فيه اللي تبينه انتي

و عشان جذي انتي نجمه ضاويه بعالي سمانا

:)

Anonymous said...

من واقع تجربة شخصية لازالت فصولها مستمرة .. في الكويت لن تستطيعي التخلص من الالسنة ولو رحلت للقمر .. والمحزن انها تخرج من افواه ممن حسبتهم يوما عونا لي على الدهر .. انه مرض الحسد

Selezya said...

قبل يومين تقريبا قاعده مع وحده من رفيجاتي واهيا متضايقه من كلام فلانه وعلانه ماقدرت اتحمل تخيلي قمت من مكاني ورحت اسوي روحي مشغوله .. يعور راسي هالموضوع لما الناس تدخل نفسها بامور ما تعنيها او تكون مثل الهوايه عندهم التكلم على الناس شي مادري شلون اوصفلج ياه بس جد حسيت بقمته وماحبيت اسمع شي

عموما .. المدونه انتي حره فيها تكتبين كل اللي بخاطرج فيه خلي كلام الناس عنج انتي عارفه نفسج

ومن ناحيه ثانيه .. صحيح انا مو بكل بوست اكون موجوده او معلقه بس ضروري تعرفين اني من ادش مدونتج اقرى كل شي طافني مو بس اخر موضوع ومن هالمنطلق احييج على روعة كللماتج بكل من " هذاك اول " و " طبع الدنيا "

والله حبيتهم وايد
:*
تسلمين وربي ما يحرمنا منج

بـابـل said...

لايانجمة لاتحرمينا من أحلى تحليق

ومهما كانت العيون لنا بالمرصاد

لازم نكسرها بنور كلماتنا

ضلي أكتبي روحك وأكتبينا للأبد

والآرواح مالها سجّان مثل الجسد


وشكرا لك عزيزتي



وبس



بابل

Q8i Blogger said...

ومع الوقت راح يكون التعبير عن المشاعر اصعب واصعب
الكويت جذي

انا كل مايكبر عمري يوم بهالعالم .. تزيد الحدود عندي .. لأني اكتشف ناس اكثر واكثر تعرفني
المعرفه ساعات صعبه

لكن هم حلو الناس تشوف ابداع ناس تعرفهم الصراحه !!

وانا اعرف ابداع نجمه

وخوش فضفضه

يعطيج العافيه :)

Najmah said...

بوسعد
يعني لما يكون شخص يعرف اسمك بالواقع
قبل لا يعرف مدونتك
ويعرف اخلاقك وتربيتك
وبعد ما اكتشف مدونتك صار يتكلم عنك وينتقدك
اتمنى وصلت :)

.
.


2cool2care
انا اتوقع الشخص لما يكتب عشان نفسه
وقد يكون غيره بالفعل يحس باحساسه
وقد يكون يحس بجزء من احساسه
وحتى لو ما حس فيها .. وحتى لو ما اعجبته.. المفروض يحترمها :)
..
عبارتك الاخيرة اعجبتني وايد
شكرا :)


.
.


كاريزما
كلامج وااقع
وياليت فضول وبس .. في ناس بس همها تعرف منو بأي طريقه
اسم الله عليج من الاحباط حبيبتي :)
ونتايجي الحمدلله
اللي طلعوا ثنتين A
ووحدة B+
دعواتج للباجي :)
:*

Najmah said...

جارة القمر
انتي فاهمتني :)
مو كلهم يعرفوني عدل
وحتى اللي يعرفوني .. شفايدة المعرفه اذا ما احفظوا سمعتي
صح كلامج
وانا ما انكر ان كل شي له قيود
والقيود قد تختلف من شخص لما آخر
لكن هل احنا فعلا تجاوزنا هالحدود؟
..
صدقيني .. مو انا اللي شخص يتحكم فيني وبمشاعري
بس اذا ماحطيت حد حق الكلام اللي ينقال .. انا اللي راح اخسر قيمتي واحترامي عند الناس
ولأني مارضيت بهالهزيمة مارضيت امسح بلوقي ولا استسلم حق هالكلام
والله حتى انا احبج واعزج وكلامج يبرد القلب :*
مشكوورة من اعماق قلبي
الله لا يخليني :*


.
.



محسد
صدقت والله :(
الله كريم

Najmah said...

سيليزيا
اعتبرهم ناس تافهة .. ماعندها هدف بالحياة الا مراقبة الناس
ومن راقب الناس مات هما
صح كلامج .. انا حرة لكن المشكلة لما يتكلمون عنج بشي مو فيج
لأنهم فسروا وحللوا على كيفهم
:)
وترى انا وايد استانس بوجودج
ويكفيني انج تقرين حتى لو ماعلقتي
عسى ربي يوفقج ويسهل دراستج
ولا يحرمنا منج :)



.
.



بابل
ضلي أكتبي روحك وأكتبينا للأبد
والآرواح مالها سجّان مثل الجسد
وااايد اعجبتني وايد وايد
ان شاء الله :)
ومشكور يابابل

.
.



كويتي بلوقر
انا بعد احس جذي
:\
حلو حق الناس اللي عالاقل تكتفي بالمشاهدة :) مو الناس اللي تتكلم وتتدخل وتفسر وكل شي
والله يعافيك من كل شر :)

صبا said...

الناس اجناس يا نجمه والنفوس تغيرت مو مثل اول

ولذلك واجب علينا الحذر في كل تصرف نتصرفه لانه محسوب علينا

:(((

بالرغم من حبي للحريه

someone_q8 said...

السلام عليكم
اختي , كتبي اللي تبينه
ومدام انتي واثقة باللي تكتبينه وعارفة ان هالشيء مو عيب ولاانه يخالف ربنا فا لا اتخافين ولا يضيق خلقج , انتي قاعدة تطبعين آرائج في وقت مفتوح
قواج الله

ShLaLaT said...

في ناس عرفوا مدونتج ؟؟ ولان جذي انتي مو ماخذه راحتج ؟؟


بالعكس نجمه كتبي اللي يريحج
لا يهمج كلام عوير وزوير

وصاجه نجمه هالعالم خلانا نتعرف على ناس كنت اعتقد وجودهم معدوم في هالزمن
وانتي وحده منهم طبعا

تحسين ان هالعالم راقي
الناس اللي تكتب مثقفه وراقيه

ناس عقلهم كبير وتفكيرهم واسع

ليش انتي تحرمين روحج من كتابة اي شي بخاطرج
عشان في ناس تافهه تفهمج غلط ؟؟

بالعكس كتبي وكتبي ومالج شغل بأحد
واللي يفهمج غلط شيقدر يسوي ؟؟
ما يقدر يسوي شي !!




انا اقول
تجاهلي وجودهم وواصلي ابداعج

:)

اي نسيت

الله يوفقج بدراستج
ويسهل عليج دربج
ويحميج من كل شي
ويخليج لعين ترجيج

وانا اخلص يوم الاربعا ان شاء الله

~ شَــهْـــرزاد ~ said...
This comment has been removed by the author.
~ شَــهْـــرزاد ~ said...

على الجُرح تماماً
!


ولكن هذه



الحياة
!!!!!!!



نجمتي البراقه...

أُهديكِ هذه الأبيات التي ترفلُ بالعزّه, لعصام العطار




وما أبـالي إذا التـاريخُ أنصـفني أوْ جارَ في حُكمهِ أو ضلَّ أوْ كذَبا


وما أُبالي لـسانَ الـدَّهرِ تـوَّجني بالحمدِ أو أعملَ الأنيابَ والقُضُبا


اللهُ قَصـدي وهذا الكـونُ أجمعهُ
لم يستثرْ رَغَباً في النفسِ أو رَهبا


حَسبي طَهارةُ قلبي في مقـاصـدهِ والنَهْجُ ما رَضيَ الرحمنُ أو طَلبا


إنْ نلتُ مرضاتَهُ فالشَّمسُ دونَ يَدي
فكيفَ أقبـلُ في آماليَ الشُّهُبا






مع كل الطُهر:
شهرزاد

5roofa said...

نجمه الغالية

تصدقين كله اي في بالي هالسؤال انزين انا لش انخش باسم مستعار اذا انا مو قاعده اسوي شي غلط
بس انتي قلتيها الناس ما ترحم

انا غيرت بلوقي و خليته خاص من حجي الناس

في ناس ما تفهم شنو معنات الي نسوي اهني و تعده حجي فاضي و لعب و تخيلي مره وحده قالتلي انتي في مكان عشان يتعرفن في على بعض و يضبطون بس بذرابه

اتنرفز من ناس كل همها انه تفهم الغير بطريقه غلط

لي ما يصير يكون لي ناس تفهمني و اصدقاء قريبة مني

ليش لازم يتحولون لي الصوب الثاني

تبين الصج اول ما بديت امبي ما كنت حابه المكان لول و كنت اقول شكله فتره و بروح

ولا شكلة ما بيحبوني

بس امبي تعلقت بالمكان الي ما اقص عليج كل يوم ادشه لانهي اشتاقلكم وايد

الحين نوخر عن هذرتي لوول و مبرووك خلصتي امتحانات صح؟؟

انشالله النتايج الحلوة ياارب

salamz sis...

sologa-bologa said...

على قولة أبو وديع

كلام الناس لا بيقدم ولا يأخر

الناس طول عمرها تتكلم وتحجي وتقول
وبالاخير تنسى

واللي واثق من نفسه
ما يهمه كلام الناس

والمدونة مكان جميل لاظهار الابداعات المخفية
:)

فلتبق هذه النجمة ساطعة في سماء التدوين

ويا جبل ما يهزك ريح
:)


ودمتم بحب وود

Kuwait said...

من راقـب النـاس مـات همـاً ..
حبوبه الناس كلامها ما يخلص ..
ولو بنلتفت لكل كلمه احنا الي بنتعب والناس ما راح يأثر هالشي فيها ..
خلهم يتكلمون وخلج أكبر من كلامهم ..
وتبقين نجمه ..
ومن يقدر يطول النجوم !!!
تقبلي مروري ..
kuwait

صالح..للشعر said...

السبب:
ان تجربة التدوين قصيرة وقريبة العهد هنا في الكويت
ولازالت طبائع البشر هنا تغلب على أخلاق الحوار والمقال والقراءة والنقد

مع الوقت سيكون الأمر أهون

والمطلوب ان يقف من يعتقد انه يحمل بالتدوين رساله سامية موقف الكاتب المحترف والمدون المثالي ولا يأبه بمن يعكرون صفوه

نحن معك في هذا ان كنت معنا فيه

تحياتي

Anonymous said...

البلوق إما رسالة لي أنا
أو له هو القارئ
أو لها هي القارئة


واللي فوق راسه ريشة يتحسس عليها
او يتحسسها

المهم
يفهم

ويسد حلجه









أنا

Anonymous said...

وهم اللي على راسه بطحة يتحسسها


خفنا ما يفهم عربي
قلنا نتكلم كويتي
اقرب
!!





انا

الخيلاء said...

تدرين وين المشكله

الناس تبي تبرير لكل تصرف
و تبي مسبب لكل شعور

ساعات نكتب اشياء احنا نفسنا ماعندنا تفسير لها

مو كل شي له تفسير
في اشياء بدون تفسير
احلى و اجمل و ارقى

بس وين الي يفهم

نصيحه من اخت لا تخلين هالشي يحد من ابداعج الانه الناس ماراح تسكت و انتي بتكونين الخاسر الوحيد

و خلج نجمه المتميزه و المبدعه الي عرفتها و حبيتها من خلال حروفها

:)

7osen said...

كلامج صحيح

انا بالنسبة لي كان البلوق مكان خاص
جداً

أول ما بديت كنت منطلق بكل حرية
وشوي شوي بديت أحس بالقيود وكل ما يمر الوقت تزيد هالقيود
ليش مادري

لكن بالمحصلة البلوق مكان تحس إنك تطير فيه وتعبر عن نفسك

خليج مستمر بنثر احساسج إللي من ذهب
يانجمة النجوووم كلهم

Najmah said...

صبا
اييي
صدقتي والله
الله يعين :)


.
.


someone_q8
وعليكم السلام ورحمة الله وبركاته
ان شاء الله :)
ومشكور وايد يا اخوي
وربي يقويك



.
.


شلالات
لا مو جذي المشكله
المشكلة لما يتكلمون ويقولون عنج كلام ماله اساس من الصحه
ويفسرون كتاباتج على كيفهم
تخافين تكتبين .. عشان سمعتج
..
وانا بعد والله
وجودكم وكلماتكم كان لها أثر كبير واكيد انتي من الناس اللي وجودكم قريب من قلبي وايد :*
تسلمين لي يالغاليه
واجمعيييييييين يارب
ويوفقج يارب ويفتح عليج من اوسع ابوابه :)

Najmah said...

شهرزاد
ياهلا وغلاا
الله يبعد عنا وعنج الجروح
والابيات روووووعة
حفظتها عندي
اعجبتني واايد وااااايد
من كل قلبي .. مشكورة :*


.
.


خروفة
اييي صح كلامج
والله مادري ليش يفهمون على كيفهم
لاا والمشكلة يروحون يتكلمون وينشرون
صج انتي زين سويتي
انا فكرت امسح البلوق بكبره
بس ماقدر قلبي يعورني
احبه .. واحب نجمة واحب اللي حوالينها
ومابي احد يكون سبب باختفائها
الله يعين
وبعدين لووووووول ماخلصت
بقالي امتحان الاحد :)
بس الله يبارك فيج مقدما :)
مشكورة ابله خروفة


.
.


سلوقا بلوقا
:)
صح لسانك ولسان ابو وديع
ويعطيك العافية على هالتعليق المتفائل :)
ان شاء الله ..وشكرااا

.
.


كويت
صدقتي .. لكن لما يتعلق الكلام بأعراض الناس يأثر :(
الله المستعان
حبيبتي والله انتي
الله لا يخليني منكم

Najmah said...

صالح للشعر
كلامك منطقي
وقد تكون التجربة حديثة لكن سبقتها تجارب مشابهة كالمنتديات
واللي يدخل الانترنت المفروض عارف إن راح يلقى ناس من كل الاطباع والاشكال المهم انه يحترمهم ويحترم افكارهم
أما الكلام عن سمعة الناس واعراضهم لمجرد اوهام وافكار وتحليلات خاطئة فهذا حتى الطبيعة البشرية ترفضه
وشكرا جزيلا :)


.
.


Anonymous
لوووووول
شفيج شسالفه؟ :)
ضحكتيييني :pP


.
.


الخيلاء
اييييي ايي والله صدقتي
والمشكلة اذا سئلوج عن منو وقلتي مو عن احد مايصدقون
ويقعدون يفسرون على كيفهم
:\
الله يعين ياصديقتي
ان شاء الله :* واشكرج على النصيحة الغاليه .. الله لا يخليني :*


.
.


حسين
لأن الناس تتدخل بكل شي
وطبيعة المشاعر اذا انطلقت ماتعترف بالقيود
الله يعين ان شاء الله
ومشكور وايد وايد ياحسين :)

Mamloo7a Q8ia said...

حبيتي اذا الواحد واثق من نفسه
ما لازم يؤثر فيه كلام الناس
صدقيني
كتبي اللي تبينه وعبري باحاسيسج ومشاعرج واستمتعي

Salah said...

تعودت أن أتجاهل المتطفلين

لا يهموني

أعلم أن حال الذكر يختلف عن الأنثى في مجتمعنا

ولكن لا فرق بين الاثنين حين يتطلب الأمر أن نتعامل مع من لا يستحق أن نحرق قلبنا من أجله

تحياتي

Najmah said...

مملوحة
ان شاء الله :)
تسلمين حبيبتي
:*


.
.


صلاح
صدقت .. وهذا المفروض
:)
مشكور وايد

QiYaDiYa said...

اكره شي لما تتقيدين بالكتابة بسبة كلام اشخاص !

و هالاشخاص لا يهشون ولا ينشون بحياتج !

يعني باختصار مالج شغل فيهم !!

مشكلة الناس انها تركب و تألف برووووووووووووحهاااا !!

طبعا تعرفين كلمتي الي هابة فيها ..

فلاااااااااااااااي ;p


استانس من كل كلمة تكتبينا ..

و احس وناسة انا و صديقتي عندنا بلوق ;p

و ما عاااش الي يضايق نجمة!
انتي بس قوليلي منو و انا اسكتهم لج افا عليييييج ;p

Najmah said...

اهليين قيادية
اييييي صح صح
على كيفها تفسر
على كيفها تحلل
على كيفها تتحجى
من حسن اسلام المرء تركه مالا يعنيه
!!
بس على قوولتج
فلاااااي :P
وبكتب غصبن عليهم
:P
وانا استانس لما اسولف معاج اهني تصدقين :)
تسلميييييييييييين ياصديقتي الغاليه
سنعي نومتج لوسمحتي
:P

Dalal said...

شلونج نجمة

حبيبتي انتي والله ولا يهمونج ولا يأثرون فيج

انا معاج 1000% لأني مجربة هذرتهم الزايدة مغرورة وشايفه نفسها وتحب العوايل والمظاهر وماخذه ماجستير بالواسطة و .. و.. والخ

وانقثيت لأن كلش مافيني هالصفات فمابالج لما أحد يتكلم بالشرف وأعراض الناس

فصح كلامج الكلام اذا زاد عن حده يقث ، لكن اشرايج ناخذها من الجانب الايجابي ، يعني مثلا : لو كنتي انسانه عاديه أو من هالتافهين اللي لا مبدأ ولا هدف وبس حش أو أو أو هل في أحد راح يغار منج أو يحش فيج أو ينتقدج بشي مو فيج ؟

لأ طبعا

فلازم تتأكدين ان كل انسان ناجح معرض للانتقاد والغيره والحسد بعد

وكل ما راح تنجحين أكثر كل ما راح تنتقدين أكثر

ويقولون الحقران يقطع المصران :) وهم يقولون تسير القافلة والكلاب تنبح :) فاذا خاطبج الجاهل قولي سلاما ونصيحتي لا تردين على أحد خير شر

أو اذا اخترتي شي تقولينه فنصحيهم والله لا تقولين مثاليات منها أجر ومنها أقل شي تفشلينهم اذا ماكو احساس لهالدرجة

وبهالوضع بالكويت الطاف أسلم

وكله حسنات اشعليج بعد :) تحياتي

Najmah said...

الغالية دلال

ياهلا وغلا

انا بخير عساج بخير

صح كلامج والله
انا كنت متوقعه ان في ناس راح تنتقد

يعني مستحيل نحصل اعجاب الكل
بس ماتوقعت كلش كلش اسمع هالكلام

انا ساكتة .. دافعت عن نفسي بللي اقدر عليه
وواثقه ان ربي معاي

كلامج وايد عجبني
وايد أثر فيني ورفع معنوياتي

اشكرج من كل قلبي
:*