Tuesday, August 19, 2008

تسافر لآخر الدنيا وتطلب مني مااشتاق



غرقانة بنومتي .. بعد ليلتين جفاني النوم فيهم

..
يصحيني صوته يناديني: نجومة قومي وديني جوكلت بار
..
أطالعه بعيون تترجى أكمل نومتي .. ويطالعي بنظرة ماقدر عليها
..
نقطة ضعفي عيونه البريئة .. تكسر خاطري ماعرف اردها
..

استسلم
" خلاص اوكي يالله روح تجهز :)
.

.
نوصل الأفينيوز ... يسحب ايدي: يالله دعاء السوق مو حافظه
انتي قولي وانا اقول وراج
^_^
..
قعدنا بجوكلت بار ...بدّع فيني
كل الناس اللي كانوا هناك عرفوا اسمي
..

فجأة : نجمة شوفي اللي هناك جنه حمني
ألف ويهي ولا رياال شكبره ومرته قاموا يطالعوننا
!!
وفجاة يصرخ
نجمة شوفيها يايبتلي بس قفشة؟ ابي شوكة وسجين
:Pp
!!
قمت آكل بسرعة .. بس ابي نطلع
:\

!!
بعد ماخلصنا وطلعنا ... يقول لي واحنا نمشي
شرايج نشتري بوك حق أبوي؟
..

تخنقني العبرة ... تطري عليي الكلمات اللي معلقة عليها
صارلها فترة مو راضية تروح من لساني
..

"
تسافر لآخر الدنيا وتطلب مني ما أشتاق
تدور راحتي وانت تبي تروح وتخليني
شسوي بصورتك عندي شسوي بكل هالاوراق
اذا يغنيك عني شي فلا شي عنك يغنيني
شسوي لا وله قلبي على قلبك وصدري ضاق
شسوي ان صارت الدنيا صغيرة بعدك بعيني
من اشرح له من احكي له من اشكي له الم الفراق
ومن غيرك في هالعالم يعرف شلون يهديني
تخيل غيبتك عني تخيل حرقة الأشواق
وتعرف ليه اترجاك ايدينيك تبقى بايديني
حبيبي لاتخليني عذاب الوحدة ماينطاق
ذبحني الخوف من الفرقا وياليتك تحس فيني
..

أمسك تلفوني..أدزها له .. ودمعة بعيني تعاندني وتنزل
..
تعبت وانا أكتمها أكثر
..
تعبت من هالغيبة .. تعبت وانا أشتاق بكل لحظة
..
كل ليلة أفقد فيها اللي يطفي عليي الليت
..
وكل فير أفقد فيه اللي يقعدني للصلاة
..
وكل صبح أفقد فيه اللي يسأل وينج ماسلمتي علييي
..
الفراق متعب ... والشوق متعب
..
وغيابك مايعوضه اي فرح
..
الطلعة اليوم ذكرتني باليوم اللي عزمتنا فيه
..
يمّعتنا .. شاورتنا .. تأكدت من رضانا
..
اسافر مع يدكم؟ بس ترى تتكنسل سفرتكم
..
ماراح تعبك علينا .. طلعت كلمة اكيد منا كلنا
..
وكنت الوحيدة اللي ادري..بالألم اللي ينبض بصدرك
..
ولما اليوم .. اسمع همك كل ليلة
..
صج ما اشوفك .. بس احس باللي يصير
..
يوصلني تعبك بنبرة صوتك
..
ما القى كلمة تواسيني وتواسيك
ما القى غير اقولك : ميخالف يبه كله بأجره
..
حتى وانت بعيد
تعلمني البر .. الصبر .. واحتساب الاجر
.

.
ركبت سيارتي ... يوصلني مسج

..
From: babaty
"

انا لو آخر الدنيا اروح ماراح اقول فراق
مدامه قليبي وياكم يذكرني ويسليني

..
يجفف دمعي السايل على خدي غزير رقراق
ولو انه مع ذلك عن الشوف ماهو يغنيني

..
عجايب هذي الدنيا لو شفتها بساير الآفاق
ابتبقى شوفة أحبابي بهالدنيا نظر عيني

..
قدرنا مهما نتجمع بهالدنيا يجي الفراق
قضاء عادل ارضاه ممن وحده يهديني

..
أسأله واهو الراحم يواسي قلوبنا الرقاق
وانه واهو الرحمن بشوفتكم يقر عيني

"
:"(
يردك لنا بالسلاااامة يارب

38 comments:

Kuwait said...

الله يرده بالسلامه ..
حاولت وحاولت وحاولت أعاند دمعتي تنزل بس للأسف كانت أقوى مني ..
الله يخليه لكم ويخليكم له ويجمعكم قريب على الخير ..

Najmah said...

kuwait
الله يسلمج حبيبتي
سامحيني على الدمعة
عسى ماتنزل الا بالفرح
:*
آمييين يارب
ويخلي لج كل غالي يالغاليه
:*

:: ENG DaLooLa :: said...

yred bel salama inshallah :)

7osen said...

الله يرده لكم سالم غانم ان شاءالله

مادري شقولج مرة ثانية
صج احساس ماينوصف لما تقرا كلام بكل هالصدق وبكل هالشفافية

هذا اصدق احساس ممكن الواحد يحس فيه

حب الوالدين ومكانتهم بالقلب مافي شي اكبر منها

الله يخليلج والدينج

فراوله said...

مساالورد والجوري
غاليتي الرقيقه
قولي آميييييييين
الله لافرقكم ويديمه فوق راسكم
وينور حياتكم ويفرح فيكم
آمين
قطعتي قلبي
والدموع انزلت بدون استاذان
حبيبتي انتي
**

Najmah said...

دلولة
الله يسلمج حبيبتي
:)


.



.




حسين
آمييين يارب
:)
مشكور وايد ياحسين
على دعواتك واحساسك الصادق
ربي يخلي لك كل غالي
:)



.




.



فرولة
مساء الغلا والشوق
آميييييين يارب العالمين
حبيبتي انتي
اسم الله على قلبج
عسى مايذوق الا الفرح
وماتنزل دمعتج الا من السعادة
:*

terkwaz said...

ماتشيلني الدنيا اذا شفت بنت ويا ابوها جذيه

دايما اقول الابو غير وصج الابو غير:)
الله يخليه لج ويديمه بصحه وعافيه

Najmah said...

terkwaz
:)
فعلا الابو غير
آمين يارب
ويخلي لج كل غالي عليج
نورتيني :))

Anonymous said...

الله يرده بالسلامة
ويجمعكم فيه بأقرب وقت

بـابـل said...

"
تسافر لآخر الدنيا وتطلب مني ما أشتاق
تدور راحتي وانت تبي تروح وتخليني

تصدقين نجمة أمر بهالحالة صارلي شهر

وودي أقول المني اللي بالبيت هذا بس موقادر


قلتي اللي بالقلب :(


تسلمين أحساسك منقذ قلوبنا من الصدأ



وموبس




بابل

بـابـل said...

نسيت أقول

الله يرد الوالد بالسلامة

ويلتم الشمل

Najmah said...

محسد
الله يسلمك من الشر
آميييين يارب العالمين


.



.



بابل
متعب الشوق متعب
والاحتياج متعب بعد
الله يبعد عنك كل الم
وتسلم يابابل
آمين يارب العالمين

₪ManaL₪ said...

السلام عليكم

<><><><><><>
عجايب هذي الدنيا لو شفتها بساير الآفاق
ابتبقى شوفة أحبابي بهالدنيا نظر عيني
<><><><><><>
الله
عجيب هالبيت


الله يحفظهم لنا يارب أهم مصدر سعادتنا و بهجتنا في هالحياة الله يطول بعمارهم


و يرد الوالد بالسلامة
و تقر عيونكم بشوفته يا رب
:)


سلامي لج حبيبه

qesat_5ayal said...

يرده لكم سالم

كلامج يعور القلب

QiYaDiYa said...

حرام عليج ..
هذا اسمه تعذيييب !!

="(


اعرف شعور لما الابو يسافر !!

شعور ما ينوصف !
لان مكانه محد ممكن يغطيه ..


الله يرجعه بالسلامة ان شاء الله ..
ولا يحرمج منه ;*

إحساس said...

كلام واضح وصادق ومن قلبج طلع ووصل لقلوبنا
ما أقول غير
الله يصبرج ويعينج

والله يرده لكم بالسلامة يا رب
وعسى الله لا يفرقكم أبد
والله يحفظكم ويخليكم كلكم لبعض
وعسى الله يجمعكم على الخير عن قريب ..

* على الهامش :
بطلي تسمعين هالاغنية \ تجيب الكآبة حتى لو يسمعها واحد يوم زواجه !
=\
واقتضى التنويه .. =)

MO3ATH said...

الله يرده بالسلامه ان شالله

كسرتي قلبي اشتقت حق ابوي وانا قبل شوي شايفه

بنطره يرجع من المسيد وبتريق معاه عن خاطري :(

lawyer said...

انزييييييييييين انا ليش قاعده اصيحححححح


:/

الله يرده لكم بالسلااااااااااامه يارب

كل شي يهون
و الصيف يهون

و كل شي يمر و يعدي

المهم انكم بخير و صحه
والمهم اهو مطمن عليكم ...



يارب تفرحون في رجعته لكم يارب

صالح..للشعر said...

ما أجمل الشعور بالبنوة التي تصدر من البنت تجاه الاب
لا اعلم لماذا هو اكبر من شعور الابناء الذكور غالبا
لعلها مسأله في تركيبة الانسان
ولكن كلمات جميله ومعبره
ويبدوا ان منزلكم يزخر بالشعراء الفطاحل ((قوية فطاحل)) :) وفقكم الله وحفظكم

kazmawy said...

والله عورتى قلبى :)
الله يرده بالسلامة

والله انى اعرف هالشعور..

يوميات مغتربة said...

نجمه

حرام عليج :"(
والله بجيتيني


ماااحب الفراق
انا فاقده الكل مو بس ابووي

:"(

الله يردهم بالسلاامه يااارب

gawga3a said...

الله يرده بالسلامه انشاءالله

charisma said...

كش شعر ينبى يا نجمه
:)
الله لا يخليكم منه ويرده لكم بالسلامه

امين

:**

قلب طفله said...

يا قلبي :(

نجومه حسيت بكل كلمه

قلتيهاو دمعت عيني

الله يجمع شملكم و يخليكم

لبعض و لا يفركم

kAiKa-MGroMa said...

u r really star

allah yshfee ydch o yrj3on besalam.

SHAHAD said...

نجووووم ببجي
العبره خنقتني حددهاا
دموعي تنزل غصب
الله يرده بالسلااامة يااارب
وتشوفونه وتقرون عينكم فيه
وربي يخليه لكم ويخليكم له
مافي شي يعوض وجود الأب

Najmah said...

منال
وعليكم السلام ورحمة الله وبركاته
اهلا وسهلا
اي والله صدقتي
اهما مصدر سعادتنا
آميييييين يارب العالمين
وربي يخلي لج كل غالي حبيبتي
نورتيني
:*


.




.




قصة خيال
آمين يارب
اسم الله عليج من العوار حبيبتي
:)



.




.




قيادية
انتي حاسة فيني صح؟
:(
آميييين ياررب

Najmah said...

إحساس
ياهلا بالاحساس كله
صج عجبني الاسم :)
آميييييين يارب العالمين
مشكورة وايد على هالدعوات الطيبة والاحساس الطيب :)
..
ان شااءالله :))
ونورتيني واسعدتيني
:*


.




.




معاذ
الله يسلمك من الشر
الله يخلي لك اياه
ويالعااافيه :))



.




.



لوووير
واي حبييييييبتي
اسم الله عليج دموعج غاليه
آميييييين يارب
لادج يريح
مشكوووورة :*

Najmah said...

صالح للشعر
بالفعل شعور البنت غير :)
شنو يعني فطاحل؟
:P
آمييين يارب
تسلم ياصالح


.




.




كظماوي
يبعد عنك كل عوار يارب
الله يسلمك
الله يعين :(



.




.




يوميات مغتربة
حبيييبتي انتي :(
الله يجمعج فيهم بأقرب وقت يارب
ويسلمج من كل شر يالغاليه

Najmah said...

قوقعه
الله يسلمج حبيبتي
:)


.



.



كريزما
حبيبتي انتي
آمين ويخلي لج كل غالي يالغاليه
:*



.




.



قلب طفله
يابعد قلبي انتي
عسى دمعتج ماتنزل الا بالفرح
آمين يارب العالمين
:*



.




.



كيكة مقرومة
صورتج عجييييبة :)
الله يسلمج حبيبتي
آمين يارب :*



.



.



شهد
حبيبتي شهودة
ياعسى عينج ماتبجي الا من فرح
آمين يارب العالمين
مشكورة يالغاليه
لا خلا ولا عدم

ShLaLaT said...

الله يرده لكم بالسلامه
ويخليكم لبعض ان شاء الله

كلماته تعور القلب

Najmah said...

شلالات
الله يسلمج حبيبتي
آمين يارب
:(

لؤلؤة said...

يرد غاليج سالم يا نجمة
والقصيد حلو :)

elq87obi said...

صباح الخير

نجمة

الله يرده لكم بالسلامة يارب

و يخليه لكم و يخليكم له

و ما تفقدين غالي إن شاء الله

سلامي لكم :)

Peace said...

الله يرده بالسلامه

و يخليه لكم

Najmah said...

لؤلؤة
الله يسلمج حبيبتي
وجودج الاحلى :*


.



.



الكويت حبي
مساء الورد والسرور
الله يسلمك يا اخوي
آمين يارب
ويخلي لك كل غالي ان شاء الله
:)




.



.



بيس
الله يسلمج حبيبتي
ويخلي لج كل غالي عليج
:)

`~MnO YeNSa! ~` said...

ولهت عليــــــــــــج :**

على بلوقج
على كل شي

الله يخليه لج
اكيـد مكانه فاضي من غير شر
يخليه لج يا رب
يخليج له
و تبرينه


فاتني
جم بوست
واااااااي
على بوست
"كثر شوقي"
مو صج
قريته
MORE THAN 4 TIMES

waaaaaaaayed 7lw
حبيته :**

Najmah said...

منو ينسى
اهلييييين
ولهت عليج العافيه بعد قلبي
:*
آمين يارب
ويخلي لج كل غالي حياتي

حبييييييبتي والله
حبتج العااافيه

ونوررررتينا
لا تقطعين
:*