يارب

"

ولنبلونكم بشيء من الجوع والخوف ونقص من الأموال والأنفس والثمرات
وبشر الصابرين ، الذين إذا اصابتهم مصيبة قالوا إنا لله وإنا إليه راجعون ،
أولئك عليهم صلوات من ربهم ورحمة وأولئك هم المهتدون

"
(البقرة – 154-157)
.

.
ماحسيت بهالآية كثر احساسي هاللحظة
..
حسيت شلون الابتلاء يصيب الانسان بيوم ليلة
..
وشلون الصبر والثبات صعب حيل بوقت المصيبة
.

.
لما ربي قال

" انما يوفى الصابرون اجرهم بغير حساب "
..
ليش خلى هالجزاء الكبير ... والاجر اللي ماله حدود؟
..
لأنه يعرف نفوسنا ... يعرف ضعفنا
..
يدري بالألم اللي يكبر بقلوبنا
..
عطانا الجزاء اللي نتسلى فيه عن ألم المصيبة
..
عطانا الاشارة اللي تقول لنا صبروا اليوم .. وبتفرحون باجر
.
.
(ماهر الساير وعائلته)
..
ما اعرفهم ... لكن قصتهم هزت كل شي فيني
..
سمعت القصة بصلاة التروايح بالمسيد .. بعد ما اخبر الامام بوفاتهم
..
كانوا رادين من سفرتهم ... واهما بالطريج من السعودية لي الكويت
..
يصير لهم الحادث
..
ويتوفى الاب .. والأم ... و4 من الابناء
..
ويبقون 3 تحت رحمة ربي
!!

..
اهتزيت من الاعماق
..
شكثر احنا صغار جدام الابتلاء؟
..
احيانا مجرد خاطر اتخيل فيه اني فقدت شخص عزيز
يحسسني بالعذاب طول اليوم
..
شلون اللي يصحى .. وفقد اسرته كلها
وفجأة بلحظة وحدة
..
قبل دقايق كانوا من اسعد مايكون
..
وبعد لحظات ... تفرقوا تحت التراب
!!
..
شكثر الدنيا قصيرة ... واعمارنا فيها اقصر
..
تذكرت كلمة سمعتها
" اعتبري بغيرج .. قبل لا تصيرين عبرة لهم "
.

.
شكثر نعم بين ايدينا مو قادرين نحس فيها
..
جم يوم قصرنا فيه بحقوق اقرب الناس لنا
..
جم مرة كابرنا فيها وسدينا باب للخير
..
جم لحظة ضيعناها وانشغلنا عنها بأتفه الاسباب
..
ابسط امور الدنيا .... تألمنا عليها
..
سهرنا الليل ... حفظنا اشعاره
..
جربنا حرقة الدموع
..
حسينا بطعم الفراق
..
عرفنا كسرة القلوب شلون صعبة
..
وعند اول اختبار مو قادرين نتحمل
...
نظنه صعب ... نظن ألمنا اكبر من الناس
ولو نلتفت ... احنا اقلهم ابتلاء
..
ماعرفت انام امس
..
أسأل أبوي شلون يعيش اللي فقد 6 مرة وحدة؟
قال لي رحمة ربي اوسع لهم واهوا ألطف فيهم منا
..
(الذهب يجرّب بالنار .. والمؤمن يجرّب بالبلوى)
.

.

.
اللهم ارحم موتانا وموتى المسلمين

وارحمنا اذا صرنا الى ماصاروا اليه

اللهم اغفر لهم وارحمهم

ووسع مدخلهم

ونقهم من الذنوب والخطايا كما ينقى الثوب الابيض من الدنس

الللهم جازهم بالحسنات احسانا

وبالسيئات عفوا وغفرانا

وألهم اهلهم وذويهم الصبر والسلوان