ليش انا جذي؟
ليش أذبح روحي بروحي؟؟
ليش كله أسكت؟؟
ليش ماقدر أتكلم ؟
ليش لما أكون مظلومة وأسمع اللي جدامي يتهمني أسكت؟؟
ليش لما يفهموني غلط ويواجهوني بقوة أسكت؟؟
ليش قلبي يصرخ ولساني مايتحرك؟؟
ليش دايما ما اعبر عن اللي فيني الا بالدموع؟؟
ليش ماقدر أتحجى وأقول ترى السالفة جذي وجذي؟؟
حتى حق أقرب الناس لي ما أبوح
وحتى وإن قتلهم إني متضايقة مااعرف أشرح الهم اللي فيني
ليش محد يقدر يفهمني؟
ليش يقولون إن قلبي قاسي؟؟
ليش يقولون إني ما احب الا نفسي؟
والله انا مو جذي
ليش مايفكرون إن همي أكبر مني
ليش مايحسون إني متضايقة عشان جذي ماكلمتهم
ليش مايعاتبوني بهدوء ويحتووني؟
ليش مايسئلون ويفهمون أسبابي؟
ليش يطلعون كل انفجاراتهم براسي
وليش انا أسكت لما ينفجرون؟
ليش ما أطلع اللي فيني وأبين لهم إنهم ظالميني؟
ليش ما أرد على اتهاماتهم اللي تقتلني؟
لييييش كله أسكت ليييش
أكتم وأبلع دموعي
وقلبي رااااح
ومابقى فيني روح تتحمل
وكل يوم اقول باجر
وايي باجر بصدماته
وانا كالعادة سكوووت
13 comments:
نجمة
حاسه فيج والله
احساس يقهر و يقتل
لكن شنقول..
ربي خلق النفوس مختلفه
ناس تقسي وناس طيبه
ناس تداري وناس مايمها الا نفسها وتقط الكلمة عليج هالكبر
بدون ماتراعي اي مشاعر لج
ولا اي احترام
لكن مالنا الا ربنا
نشكيله و يسمعنا
ندعيه ويستجيب لنا
الحمد لله على كل حال
لأنج متربيه تربيه زينه
:)
يا بخت من نام مظلوم
هونيها يا اختي
بس لا تسمحين لأحد انه يتطاول عليج او يغلط
خلي نفسج عزيزه
وعدا ذلك طوفي
نصيحة اخو
بعثرة مشاعر
اي والله صدقتي
وشنو اللي يصبرنا غير الناس الطيبة مثلج
الله يخليج ولا يحرمني منج
والنعم بالله
مالنا غيره :)
اشكرج يالغاليه
مناف
:)
يعطيك العافية على هالنصيحة
ان شاء الله
وعسى ربي ييسر الأمور بتيسيره
شكرا لك
very good blog congratulations
regard from Catalonia Spain
thank you
لانج كائن رقيق ولانج بريئه
ولانج توج صغيره على المواجهه والكل بيشوف انه خبرتج اقل
والوقت كفيل بكل شي وراح تشوفين انهم مع الوقت بيعرفون منو نجمه
هذي التجارب الي نتعلم منها شلون الناس يكونون وشلون احنا بنكون ولازم تجربين عشان تتعلمين
الله مع الكل توكلي عليه
:)
الانسان اذا عرف المشكله تنحل نصها ويعتبر جنه عدى نص الطريج ..
انتي عارفه مشكلتج وان سكوتج اخذ وايد من حقج وماقدرت تعبرين فيه الا بكتابتج .. حلو ان الانسان يقدر يواجهه بس مو بكل شي .. بالاشياء اللي تستاهل فقط اما غيرها فمالاداعي .. موقفج في ظلم لج وهالشي لازم تدافعين فيه عن نفسج .. حاولي ولو مره تتكلمين وبكل هدوء وبوقت حلو دافعي وقولي اللي بخاطرج عسا يفهمون انشالله
والله يصبرج
الصغيرة الجميلة نجمة
أتمنى لك التوفيق والتقدم بإذن الله ولدي نصيحة لك عزيزتي بأن الخواطر تختلف كل الإختلاف عن الفضفضة وما كتبته كانت فضفضة حاولي أن تقومي بتلوينها بإستعارات وتشبيهات حتى لو كانت بسيطة لتضيف جمالا على الجمل
كما أتمنى أن تأخذي وزن الجمل على محمل الجد لأن كتابتك جميلة لكنها بحاجة إلى توجيه بسيط
أتمنى أن تتقدم كتاباتك أكثر فأكثر لأنها مميزة وحساسة جدا وتصدر من قلب صادق جدا
حفظك الله ورعاك أختي العزيزة
Té la mà Maria - Reus
thanks alot :)
مجنونة
صح كلامج .. الدنيا تعلمنا
والتجارب تعلمنا
وكل يوم نفهم الناس أكثر
ونعرف الدنيا أكثر
والنعم بالله :)
اشكرج يالغالية .. الله لا يخلينا
سيليزيا
تدرين شنو المشكلة
المشكلة إن الواحد يكون ضايع مايدري شنو الأسلم والأحسن؟
إن تكلم يمكن يجرحهم
وإن سكت يجرح نفسه
وأكيد بيختار الثاني :)
ومع الأيام خلاص .. يصير تعود على هالشي وتعود على السكوت بكل الأحوال
الله كريم
مشكوورة يالغالية وعسى ربي يسعد قلبج :)
سيدة نفسي
تدرين شنو فرحني ردج :)
تدرين شنو انا من زمان أبي أحد ينصحني وينتقدني
ماراح انسى نصيحتج
اشكرج من قلبي
بس عندي سؤال
مافهمت شنو يعني (وزن الجمل على محمل الجد)
:)
وبالنسبة حق اللي كتبته ماكنت حاطته على إنه خاطرة .. مجرد فضفضة مثل ماقلتي :)
الف شكر لج يالغالية
السلام عليكم والاكرام
وانا اسعد غاليتي بردك وتلقيك انتقادي بصدر رحب
"بالنسبة لسؤالك لجملتي " محمل الجد
اقصد بها ان تعاملي خاطرتك على انها اول واخر نتاج ادبي تقومي به لتستطيعي التركيز على وزن الجمل والوزن يصدر موسيقى الالقاء وينتج عنه الاستمتاع حين نستمع الى الخاطرة
وبما انها فضفضة فيمكنك أن تهملي جزئية الوزن
ولأنني احببتها اردتها ان تأخذ منحنى الخواطر لتوفر الابداع في ارضك الصغيرة الخصبة
اتركك برعاية الله
يا نجمة احسج اتكلمين عني والله لدرجة اني لما قريت بدون شعور دمعت و بجيت .. ليش حتى لما نفكر بتكلم واقرر بدون رجعة القى نفسى جني وحدة حنى ماتعرف تتكلم حتى عربي .. و ارد امسك القلم اقول يمكن هو اللي يفهمني .. ليش !!؟؟ والحل الدموع تالي الليل على المخدة نعده الصدر حنون لان للاسف عشان نخــــــــــاف نتكلم ليش مادري ... ادري صكيت راسج بس يبتيها على الجرج ... مشكووووورة خليتيني شوي افضفض ..
صج صج والله
ليش انتي جذيه
اتقي شر ما تتمنى...كنت نفسج في يوم من الأيام والحين ساعات...أقول ساعات مو دايماً...أتمنى إني أرجع لذيك الأيام...الله يكون في عونج والله
سيدة نفسي
وعليكم السلام والرحمة
نصحيتج غالية
ماراح انساها ان شاءالله
اشكرح من الاعماق
منو ينسى
سامحيني اذا فجرت اللي فيج
احس فيج والله احس فيج
الله يعين
بالعكس..يشرفني مرورج
عسى ربي يريحج دنيا وآخرة
براك
مادري
لأني جذي !
الزين كله
لا لا تتمنين ولا تنحطين بهالموقف يارب
عسى ربي يسعدج
Post a Comment