Wednesday, January 23, 2008

ليلة امتحان



بما إني وعدت الغالية خروفة أكتب شي مايبجي بهالبوست قلت ماكو إلا أحط هالقصيدة اللي قصتها قصة

الله يسلمكم كانت ليلة آخر امتحان .. وكنت طايرة من الفرحة لأن أخيرا بتبدي عطلتي
وفااصلة على الآخر .. ولما نص الليل وانا لما الحين مو دارسة

.. وتسلطت عليي الأفكار من كل صوب

..
والتخطيطات والمشاريع بكل أنواعها .. والقصص والخواطر والمشاعر وكل شي يخطر على بالكم ومايخطر

:)

ومن بين هالحوسة تخيلت إن واحد قاعد يكلمني ويقول لي قصته

..

وكتبت انا هالقصيدة بلسانه

=)


.

.

.



شبهوا حبيبتي بذاك القمر
والقمر يوم شافها غار وحسدها
..

حبيبتي مامثلها اثنين بالبشر
حبيبتي لا شافها الحرف فزّ وقصدها

..

حبيبتي رمش عيني والنظر
ودنيا مشاعر كيف أحصي عددها

..
حبيبتي الضحكات بكل الصور
و غيمة مطر تسقينا بمددها

..
لو انها شكت قالت عيوني أمر
تسهر دموعي بس يغفى سهدها

..
حبيبتي هي دنيتي واهي كل العمر
وهي نهايات المحبة وهي مهدها

..
حبيبتي وقلبي عنها ترى ما صبر
ماذاق السعادة وماشافها من فقدها

..
وقولوا له اللي شبه حبيبتي بالقمر
ترى القمر يوم شافها غار وحسدها


وسلاااامتكم


:)

24 comments:

Mamloo7a Q8ia said...

الله يا سلاااام
عادي من يصير عندج امتحان تطلع كل السوالف والابداعات
بس صج صج خوش ابداع
ويا بختها حبيبته بهالوصف الروعه

الخيلاء said...

يا بختها هالحبيبه بهالحبيب :)

دمتي لنا نجومه :)

esTeKaNa said...

مسا الاحساس يا نجمة الكل
:)
واي ذكرتيني بروحي
كنت ليلة الامتحان اكتب اشيا جميله
وكل شي حلو يطري لي
انزين درسي؟
ما اقدر اركز
!!
اوراقي بلخص فيها واشرح فيها
فجأة اقلب الورقه واكتب بوست
ايام البلوق القديم احلى البوستات كتبتها ليله امتحان وايام دراسه
مادري ليش
:))
الكلمات تينن
طبعا انا اعتبرت انا هالبنت
اللي انكتب فيها الحجي
بخاطري اونس روحي
ميخالف قصو علي
يعني اهو قالج كتبي عن استكانه هالحجي؟
ادري ادري ما يقصر هالمجهول
:Pp~
بس ليش نشرتيها نجمه؟
انا اخاف احد ينضلني
:)

Q8i_Blogger said...

انا عندي امتحان .. وداش اقرا

فالمشاعر داشه صح .. من وحي إمتحان إلى إمتحان

بس اهداء جميل

خل أهديه حق الوالده (A)
:P

يعطيج العافيه .. وحلو التغيير
نصايح خروووفه ممتازه :)

Najmah said...

مملوحة
ايييي وقت الامتحان كل شي كل شي يطلع
:)
تسلمييين والله حبيبتي
لا خلا ولا عدم :*



الخيلاء
ويابختي فيكم :)
ودمتي لنا يالخيلاء :)



استكانة
مساء الحب والغلا كله
اييييي والله
تصدقين حتى انا نفسج
اييب اوراق بلخص فيهم القى نفسي اكتب خاطرة
وصح احلى البوستات كتبتهم لما يكون عندي امتحان
اصلا يومها كل شي اسوي
ويصير فيني حب حق النت مو طبيعي
ووله وشوق حق كل الناس لازم اسأل عنهم
لوول يبيلي بوست كامل عن الفن في الهروب من الدراسه :p

استكااانة انا سكت وماقلت ان عنج عشان لحد يغار ويحسدج بس انتي الله يهداج فضحتي روحج يعني انا بريييئة مالي شغل :p



كويتي بلوقر
لووول الله يوفقك ويسهل عليك
عيل لا تحاتي الامتحان سهل لأن امتحاني كان سهل
والنتيجة حلوة ان شاء الله لان نتيجتي كانت حلوة :)
وتستاااهل الوالدة الله يخليها لكم ويحفظها
:)
الله يعافييك
وموفق ان شاء الله

Sn3a said...

شهالحجي الحلو
صح لسانج

على قوله نبيل شعيل
ياقلبي والله البنات تسحرهم بكلمتين
اهو قصده تقص عليهم بس استحى يقول:P

Najmah said...

سنعة
ياهلا وغلا والله
وجودج الاحلى
ربي يسلمج ويعافيج ويخليج
لووول
اي والله مساكين احنا صج بكلمتين يقصون علينا :")))

Aldenya said...

الله
يابختها
نجمه
انتي صج اجمل احساس
احب كتاباتج
احب اسلوبج بالكتابه
وعندى نظرية خاصة
اي أحد يكتب شعر وخواطر
انسان حساس
حساااااس لآخر درجة
يحط نفسه بكل المواقف
يحس بجميع الحالات
حب , خوف , فراق , وله وشوق
فقدان
يسلم لنا
احساسج
ويسلم لنا قلبج

عثماني said...

يه يه يه

خوش كلمات نجمة

دايما مبدعة

darkness said...

ما هي قمر هي نجمه تضوي بعالي سمانا

نورها ما هو انعكاس

نورها من روها الصافيه

ادعي ربي يحفظها و يحميها

و يوفقها و يدد خطاها

----


بشري شلون النتايج؟

bo rashed said...

يا سلام انا اول مره ادش عندج يا نيمتنا وشفت هالكلام البديع الله جان زين عندي احد يقولي هيك كله زف وتدقر
:(

انا ايام الامتحانات كان الشيطان وايد مؤثر علي كنت لاهي مع البراشيم

الصراحه شعر جميل

تحياتي

بـابـل said...

صباح الورد نجمة

قصيدة حلوة

وزين قدرتى توصفي جمال بنت وانتى بنت مثلها هذا لأن عندك شاعرية عجيبة

بس بدون مجاملة أنتى بالقصائد الحزينة كلماتك اقوى واحلى

وخصوصا البوست اللي طاف للحين اردد كلماتك بينى وبينى



وبس


بابل

5roofa said...

ياا سلااااااااااام
بعد عمري والله

لا لا لا جذي ادعي كل مره يصير عندج امتحانات عشان تفصلين فصله حلوه جذي

القصيده روعه
واااي وينه هذا ماكو يشعر فيني شوي لوووول

يااااااارب قوولي يارب معاي

تلقين واحد يقولج مثل الي قلتي و اكثر

تستاهلين اكثر يا حلوه

salamz dear...

SHAHAD said...

يا عيني عليج
تخيلت نفسي الحبيبة .. حدي عشت بالأحلام لول
مشكورة يالغالية على هالقصيدة الروعة
عن جد حبيتهاا
نبي دايما كلمات حب ما نبي حزن اوكي : )

Eng_Q8 said...

صح لسانج

واجازه سعيده

Anonymous said...

اعتقد انه هالحبيب ما شاف حبيبة قلبي نونه

:))

احم احم ترى مو بس عشان خروفه وعشاني بعد ايي ترى اغار شنو يعني شنوو؟؟؟؟
ها؟

وكل ولا الامتحان مع انه ما تحلى الخطط والسوالف السنعه الا بالامتحانات بس شدي حيلج

ترى انا قلت للكل انه نونه بتتفوق هالسنه مو تفشليني

:))


ولهت عليج كلمه بسيطه بحقجومشتاقتلج مووووووووووووووت ولا توصف احساسي حتى


ديري بالج على نفسج


magnoonah

乂♥Not.ViRGo♥乂 said...

صح لساني قريتها
:))

و صح ايدينج لانج كاتبتهاا



روووعه :)

فراوله said...

مساالورد والجوري
غاليتي الحبيبه
اغلا نجومه
اعشق تلك المشاعر الراقية عندما ترتبط
بشخص يكون مكانه
بعمق الروح
دمت بدفء وعذوبه
ابدا
:*

`~MnO YeNSa! ~` said...

اللــــــــــه اللــــــــــــــه اللــــــــــــــــه حدها حلوة الكلمات مشالله :*

ها شلون امتحاناتح انشالله كل شي عال ؟!؟

ZoZOta said...

يه يه يه

عجيييييييييييبه القصيده

شي شي

يازينج لين صرتي رايقه هالشكل

كلامج بلسم وعسل

:**

Najmah said...

الدنيا
يااطيب احساس بهالدنيا
يشرفني اعجابج
ويشرفني حبج للي اكتبه
شعورج غالي حيل
وتسلمين لي وتسلم حروفج :**
الله لا يخليناا



عثماني
شكرا جزيلا على هالوجود
حياك الله :))



داركنس
الله شنو هالتعبير :))
جذي استحي انا =")
ويوفقج يارب بكل خطوة :*
الحمدلله زينة تفرحج :))
تسلمين لي ياجارتي :*



بوراشد
حياااك الله نورتنا
وان شاء الله ماتكون الاخيرة
:)
لوول ان شاء الله تلقى اللي يقول لك
احلى من هالكلام :)
وبعدين لاا شنوو غش الله يكافينا شره :)
وجودك الجميل اخوي :)



بابل
صباح النور والفرح والسرور
الاحلى تواصلك اهني :)
اييي انا اوافقك مادري ليش دايما اللي اكتبه بلحظة حزن احلى بواايد من اللي اكتبه بالأوقات الثانية
يمكن لأن بأوقات الحزن تكون مشاعري مكبوتة ماتلقى إلا الورقة تطلع فيها
اما بالاوقات الثانية سهل أطلع مشاعري بغير الورق
:)
شكراا لوجودك بابل



خروووفة
اخييييرااا رد مافيه بجي وناااسه :))
لووول لا الله يخليج ماصدقت اخلص امتحانات :)
انتي الاروع حبيبتي :**
ويااااااااج ياااااارب
:)

Najmah said...

شهد
ياهلااااا وغلا والله
لووول ان شاء الله يارب تكونين الحبيبة ويرزقج اللي يسمعج احلى من الكلام :**
حبتج العافيه والجنة الدافيه حبيبتي
ان شاء الله :))



مهندس الكويت
صح بدنك :)
ووياك ان شاء الله :)



مجنوووونتي
تدرين كنت بقولج انا زعلانة عليج ولا تكلميني
بس ماااقدرت :)
جذي تخليني افقدج واشتااقلج
كل مرة ادش بلوقج واقول يمكن اشتاقت مثل مااشتقنا
صج ولهااااااانة عليييييييج
وخلاص ولاااا يهمج انتي تستاهلين
افا عليج البوست الياي بس حقج :***
وترى انا عند كلمتج تفووقت وقريداتي كلها عاليه الحمدلله ومعدلي ارتفع :))
وانتي ديري بالج على روحج وقلبج لا تتعبينهم انزين؟ :)
لا تغيبيييييين :***




乂♥Not.ViRGo♥乂
صح بدنج يالغااالية
وجودج الروووعة :))



فراولة
مساء الحب والاشواق
ياهلا وغلا بالحبيبة
تسلمين لي يارب وتسلم مشاعرج الطيبة ووجودج الراقي :*
دمت بحب :)



منو ينسى
ياحبيبتي انتي
وجودج الاحلى :))
ايييي الحمدلله كلها زينة والفضل لله :)



زوزوتي
ياهلا وغلا والله
وجووودج الاعجب :))
وكلامج احلى من العسل :**
لا خلا ولا عدم :)

غريب said...

عجيبه

Najmah said...

شكرا غريب
:)