Monday, February 11, 2008

ضاعت نجمة

من أمس وانا أحاول اكتب بوست مو قادرة أحس متكسرة مافيني حيل
الله وكيلكم يومين أحس بس أبي انام .. فيني نقص نوم
هناك خوالي ماشاء الله مايخلون الواحد ينام
:P
لا بالليل ولا الصبح ولا الظهر ولا العصر
مايبون يضيعون ولا دقيقه
وكل يوم يقعدوني من الصبح واذا ماقمت يبدا الهجوم
أول شي يفتحون البردة والابجورات بعدين ايي خالي يدلدغني لما اقوم جني حصان
:\
والله تعب تعب
انا قبل عبالي بس الحريم يحبون السوق طلعوا الرياييل ماشاء الله يحبون المشترى والسوق اكثر منا
:)
أحلى شي كان بهالسفرة ان يدتي معانا
وأحلى شعور حسيت فيه لما أكون معاها وأساعدها وأدهنها وأهمز ريولها
وأمشط شعرها
صج صج كانت متعة مابعدها متعة
والله نصيحة لا تطوفون عليكم أي دقيقة تقدرون تستغلونها وتبرون فيها أمهاتكم وآبائكم واجدادكم
راح تحسون بشعور والله ماتعرفون حلاوته الا لما تجربون
:)
اي صج نسيت اقولكم سفرتي كانت الى دولة الامارات الشقيقة
:)
مرة من المرات كنا رايحين القرية العالمية عاد أول مادخلنا شفت صبي صغير يمشي ويدور بروحه
وشكله خايف وحسيت ان ضايع جان اروح له اسئله تدوّر ماما؟
جان يبجي =\ كسر خاطري وقعدت أدور معاه شوي جان فجاة يركض حق واحد
ويلمه طلع أبوه
..
دمعت عيوني وابتسمت وبقلبي أقول
فعلا الانسان ماله غنى عن والدينه وحنان العالم كله مايساوي لحظة حنان مع أهله
المهم ومشيت وكملت طريجي
وبعد ماخلصنا الحين بنرجع البيت اانا كنت قاعدة امشي بروح لما قريب من البوابة اللي دخلنا منها
واهما كانوا وراي
وبعدين لما نص الطريج جان اوقف مادري أي صوب أروح ييت التفت بسألهم
ولا مافي احد وراي
=\
ووقفت انطرهم وانطر وانطر وانطر
وماكو احد :(
ييت بتصل عليهم تلفوني مافيه رصيد عندي 300 فلس مايدق ولا حتى يستقبل
يعني يالله يدز مسجين =\
مادري شصار فيني حسيت اني خلاص راح أبجي
دزيت مسج حق أخوي وينكم .. ونطرت مدة ما رد عليي
:(
جان أمشي ولا أشوف بوابة بويهي قلت خل اجرب اطلع منها يمكن اهما اهني
طلعت ادور يمين يسار ماكو احد
:(
والمواقف كبيرة كبيرة وزحمه واهما كانوا منزلينا عند الباب ورايحين يصفطون
يعني حتى ما ادري وين صافطين
ولو ادور من ايوم لما باجر ماراح أخلص
:\
استسلمت ودخلت مرة ثانيه قلت بدوّر مكان ادق منه
والدمعه طبعا بعيوني .. وقلبي يرقع وأقول يمكن ردوا البيت عني
واحنا يايين بسيارتين يمكن كل سيارة عبالهم انا بالثانية
والطريج طويل واهني يسكرون وانا ماعرف احد
و.....الخ من الافكار اللي تلعب براسي
:\
فجاة
وصلني مسج
ولا من خالي يقول
" تعالي عند بوابة 4 انا ناطرج "
امبيييه اهني حسيت قلبي ارتااااااااح
ركضت حق الاستعلامات اللي كان يمي
وكان بيدي جياس جان واحد منهم يطيح
ويطيحون الاغراض اللي فيه
=\
شلتهم بسرعه ورحت سئلته وين بوابة 4
جان يدليني ويقول لي تعالي خل اعطيج جيس كبير
تحطين فيه اغراضج
:P
عطاني اياه والله يزاه الله خير صج ماقصر الله يفرج عنه دنيا وآخره
:)
وبعد مامشيت صوب اللي قال لي لقيت خالي بانتظاري
وردت روحي
والحمدلله على سلامتي
:**
آخر شي
كل ماتحط ريولي بمطار الكويت تتحد الابتسامه مع الدمعة
أحب الممر اللي أمشي فيه أدور اللي يايين يستقبلونا
أحب لحظات اللقاء بالمطار :)
وأحب كل صغيرة وكبيرة بالكويت
كل ماسافرت ورديت أحس بغلاج يكبر
وأحبج أكثر وأكثر :**

23 comments:

Q80 Blogger said...

شكله نيتج كانت شماته بالولد الصغير

والولد ماثناه .. بنفس اليوم صارت فيج :P

بس آخر كلام الي بالاحمر يضيق الخلق

يعبر صج .. بس يضيق الخلق

يعطيج العافيه
:)

Najmah said...

بلوقر
ماشاءالله دايما أول تعليق :))
لوووووول
لا حرام كلش مو قصدي
:)
الله يردك لديرتك بالسلامة يارب
والله يعافيك :))

SHAHAD said...

الحمدلله على سلامتج
صج السفر تعب وماكو نوم
بس كافي اليمعة فيه مع الأهل والقعده معاهم .. تحسين بجو ثاني .. حده ونااسة
الله يخليج لأهلج ويخليج لهم :)
ومرة ثانية حطي بالج عدل .. لا تضيعين :)
بوست ممتع

darkness said...

الحمد لله على سلامتج

يمه

اسم الله عليج من الخرعه

:(

بس حلو انج تلقينهم

تحسين انج ولهتي عليهم وايد مع انج ما فارقتيهم اكثر من ساعه؟

الحارث بن همّام said...

انا ليلحين اذا ضعت عن أمي بالسوق أبجي ..






أبجي من الفرارة بالسوق من غير شغل

Anonymous said...

ضاعت نجمة ووجدوها :)


حزتها تمنيتي أكون في بيتنا صح
وتمنيتي يصير عندج رصيد صح
وتمنيتي انج ما طولتي وانتي تكتبين رقم الحساب بالمسج صح؟؟

الحمدلله على السلامة عزيزتي

Barrak said...

الحمد لله عالسلامه

اه يالكويت
يانبع الوفى الصافي
ياعشنا الدافي

Najmah said...

شهد
ياهلا وغلا
الله يسلمج حبيبتي
ايي صدقتي الحمدلله :)
ويخليج لأهلج واحبابج يارب
الممتع وجودج :))


داركنس
الله يسلمج حبيبتي
اي والله خرعه
صح صح صح
صج حسيت بردة الروح :)



الحارث بن همام
لووووووووول
:))
الله يخلي لك الوالدة يارب


الأثير
اييييييي والله صح
اصلا تصدقين مااذكر شلون كتبت المسج وشلون دزيته بسرعة
يالله الحمدلله
الله يسلمج يارفيقة مشاعري :**


براك
الله يسلمك من كل شر
الكويت الحضن اللي مانقدر نفارقه
:)

5roofa said...

هاااي

امبي نجمه سووري تدرين توه يطلعولي البوستين مع بعض

كل يوم ادش ماكو بوست يددي و الحين اثنين

سووري على التاخير

لوول سملة عليج من الضيعة عاد انا لو مكانج وااي و اضيع بره يعني مو بالديره الله وكيلج قيامه تصير

لوول عاد انا صج مو مال هالسوالف انهار لول

و انا بعد تصدقين وايد اشتاقك للكويت لي سافرت لوول امي تقول تهدون الخضار و البراد و تردين للحر ليش
اقولها مادري بس احبها لوول

مشكوره على البوست الروعه و الله يخليلج يدتج ياارب

salamz sweetee...

7osen said...

احلى شي النوم

نامي لحد ما تشبعين

:)

أي والله شعور الإنسان واهو يبر والدينه شعور ما ينوصف

الله يخليلج يدتج إن شاءالله



وزين إنج ما ضعتي
لازم تليفونج بهالموقف مايكون جذي بدون رصيد

:)

ولد الديرة said...

ما احب ريحة الزقاير اللي بالمطار كأنه مطعم الجمهورية العراقية مال الكباب بس بدون الشايب مال الجاي

مرة ثانية اخذي معاج كرت تلفون احتياط :P

Shaima'a Alkandari said...

الحمدلله على السلامه يالغاليه وقرة عيونا برجعتج للكويت
زاد نور ديرتنا بييتكم

وكسرتي خاطري يوم ضعتي ومحد رد عليج الا بوقت متأخر

ماعليه تعيشين وتاكلين غيرها ياعسل

نجمه اهم شي يدتج واهلج واللى مافيه خير باهله مافيه خير بالناس

حطي بالج عليهم وخلج دوم قريبه منهم

وفعلا اجمل لحظه لمن تردين لأرض الوطن وتلاقين احبابج بانتظارج

والحمدلله على السلااااامه


نسيت اقولج النوم انسيييييييه لي سافرتي ولاتضيعين ولادقيقه بالسفر

فراوله said...

مساالورد والجوري
غاليتي الحبيبه
اول شي وحشتينيييييييييي حيل حيل حيل
والف الحمدلله علي سلامتج
وسامحيني علي التاخير
وثاني شي
اشوه انج لقيتي خوالج جان صارت سالفه ثانيه
نجمه مع مهب الريح
هههههههه
اتغشمر معاج حبيبتي
ولكم باك
وسفره سعيده
غاليتي
دمت بدفء وعذوبه
ابدا
:**

بعثرة مشاعر said...

الحمد لله عالسلامة يالغالية
لوووووووووووووووووووووول

والله ضحكت عليج و انتي ظايعه
ياملقها الضيعة
تحسسج بشعور انج ياهل

;p

الحمد لله على السلامة
و حلوة السفرة بهالوقت
بس هم الكويت حلوة ;)
عليكم بالعافية

Selezya said...

حححححمددددلله عللللللى السلالالامه

لووول وقته تضيعيين يعني
حبيبتيي انتي محد يضيع بالامارات

الف الحمدلله على سلامتج :)))

بـابـل said...

حمد لله عالسلامة

والدار أمان

الأمارات اهلها طيبين حتى لو ضعتى

بين أهلك وناسك

الله يخليلك يدتك وخوالك

والله يديم المحبة بيناتكم


وبس


بابل

Najmah said...

خروووفة
ياهلا وغلا
ياحبيبتي انتي يمكن خيرة عشان لا يضيق خلقج وتنزل دموعج ;)
لوووووول بعد قلبي اسم الله عليج من الانهيار الله لايحطج بهالمواقف
ايي ديرتنا غير ياخروفه
نحبها بحرها وغبارها وكل شي
وعسى ربي يخليج لأحبابج حبيبتي :)



حسين
ان شاء الله بس المشكلة مابقى شي على الدوام الله يعين :)
اي والله وعسى ربي يخليك لأحبابك ولا يبعدك عنهم
خلاص تبت وخليت خطي الثاني فواتير :P


ولد الديره
لووول انا ماشميت ريحة زقاير :P
اي خلاص خذيت درس :))
حياك الله

الزين said...

الحمدالله علي السلامة

واللي يخلي لج يدتك ولا يحرمج من أجرها

:**

Najmah said...

شيومة
الله يسلمج حبيبتي وتقر عيونج بشوفة الرحمن يارب
والنور نوركم يالغاليه :)
لووول اي على قولتهم أكبر وأنسى :P
صح لسانج عسى ربي يعيننا على برهم
وربي يسلمج ويخليج لأحبابج
والنوم نسيته والله نسيته :P
مشكوورة شيووومة :*



فراولة
انتي وييييينج فقدناج من غير شر
وحشتيني اكثر وولهت عليج :*
الله يسلمج حبيبتي
اي والله الحمدلله اسم الله عليي :P
تسلمين لي يا اغلى فراولة
الله لا يخلينا



بعثرة مشاعر
الله يسلمج حبيبتي
لووول اي ضحكي ضحكي :P
بالضبط قلت هالكلمة حسيت صج اني جني ياهل :p
الله يسلمج يالغالية
:))
نورتيييييني :*



سيليزيا
الله يسلمج حبيبتي
لووول شسوي :P
الله يسلمج ويخليج ويعافيج يارب



بابل
الله يسلمك من كل شر
اي صح والله طيبين والنعم فيهم بس صج اخترعت :))
آمين وربي يخليك لكل اهلك واحبابك
شكرا بابل



زيوون
الله يسلمج حبيبتي
اجمعين يارب
ويخليج لكل غالي على قلبج :*

حياتي هدف مو عبث said...

الحمدلله على سلااامتج

ليش ما دقيتي علي ؟؟

Shather said...

:*

الحمدلله على السلامه


شصيرلج انا ؟؟ ههه

اعيش باحساس جياش لما امشي بالممر

Peace said...

الحمد لله على السلامه
لانج رديتي
و لانج لقيتي اهلج

مره ثانيه تاكدي من البطاريه
و شحني التلفون
الله يخليج

:)

Najmah said...

حياتي هدف
الله يسلمج ويخليج
لوول مادري تصدقين
مرة ثانية لازم اخليج للطوارئ
:P



شذر
الله يسلمج ويعافيج حبيبتي
لووول اييي والله صح شعور مو طبيعي؟
:*



بيس
الله يسلمج ويخليج يارب
لوول ان شاءالله :))