Thursday, July 3, 2008

Messege


كانت تجلس بجانبي ... تحتضن حقيبتها الصغيرة
تضع بأذنها سماعات "الايبود" ولسانها يترنم بالغناء
..
عيناها تنطق بشيء غريب
أحسست بالرعشة تسري في قلبها .. كلما أخرجت تلك الورقة من حقيبتها
تخفيها بين يديها .. تنظرها وتبتسم.. ثم تخبؤها سريعا
واضطراب ينبض في داخلها
..
أتأملها وعيني تخاطب مراهقتها .. وتعيد ذكريات مغبرة
..
سئلتني: تبين تسمعين؟؟
-انا: لا .. بس ممكن اشوف الورقة؟

;)

ارتبكت نظرتها .. شعرت ببعض التأنيب
..
بعض الاشياء تكون عزيزة جدا علينا
الى درجة أننا نرفض أن يطلع عليها سوانا
..
!!
..
لا سر-

خلاص اوكي -
ليش بتشوفينها؟-
- ممم..لأنج تحبينها..ولما تشوفينها تفرحين صح؟
نجمة .. أمانة لا تقولين حق احد-
اوكي-
..
أخرجت من حقيبتها صورة باهتة .. وورقة دونت عليها بعضا من المشاعر
..
أخفت بيدها ذلك الاحمرار في وجنتيها

..
وابتسمتُ طويلا وانا ارى مشهدا تكرر أمامي بعد سنوات طويلة

..
في نفس المكان .. مع اختلاف الزمان
..

كانت شقيقتها تبوح بنفس الشعور .. بمثل الرجفة .. بمثل النشوة
وكنت اتبعثر في احساسها .. أوبخها تارة .. وأنصت لها تارة
وأفكر لها بخطط جهنمية في بعض الاحيان
!!
..
أيقظني من شرودي سؤالها المفاجئ
..
انتي ماتحبين؟
!
أحب وايد-

صج؟؟ ليش؟ -
مممم ..انا بقولج شي حتى لو مافهمتيه الحين بعدين راح تفهمينه
..
لأن الحب مو كلمة وتنقال .. الحب مواقف وأفعال
لا تدورين على هالحب بعيد .. لأنه موجود معاج كل يوم
بس يبيج تشوفينه وتحسين فيه
!!
بتشوفينه بعيون امج..لما تردين من مدرستج تعبانة من الشمس..واتييج تلمج وتقولج
حبيبتي شلون يومج؟
بتحسينه بخوف ابوج..لما تقعدين تالي الليل مريضة .. وياخذج يركض فيج المستشفى
بتسمعينه بصوت رفيجاتج..لما تغيبين يوم ..ويقولون لج ترى الصف مايسوى بدونج

وايد ناس تحبج وتخاف عليج .. انت بعد حبيها..ولا تنطرين شخص مايدري عنج
!!
..
ودعتها بعد ذلك لأجيب اتصال والدي .. ولا يزال بعض الاضطراب يعبث بداخلي
..
قد تخرج مشاعرنا عن اراداتنا ... قد تظهر في ملامحنا رغما عنا
قد تلتمع بنظراتنا التائهة .. وتنسكب بين أطراف أحاديثنا .. وتندس في طيات ورقاتنا
ربما يوافقها الواقع فترتفع ... وقد تهوي محبطة في خيبات الأمل

ولن يكون ذلك الوقوع ... إلا أملا في ارتفاع آخر
!!
لا تتوقف الحياة يوما لتنتظر شخصا حزين
وكذلك الحب .. فلن يقف يوما على حدود انسان
..

شيء من الألم يصقل بعض المشاعر
يحيلها للتنفس في جهة مختلفة
يغلفها برداء يحميها من التعرض لحرارة الغد
..

قد تكون تجربة قاسية .. لكنها محملة بتفاؤل جديد
فإن لم ينمو ذلك الحب في أحد القلوب
فحتما سيثمر في قلب آخر
:)

.

.
.

نقطة أخيرة
الحب يذهب بالفوارق كلها *** و يحبب الشقراء و السمراء
و يجمل الشوهاء حتى لا ترى *** عين المحب حبيبة شوهاء

18 comments:

fatto said...

تسلم هالكلمات الحلوه :)

Super Woman said...

صاجه وايد ناس يحبونا واحنا ما نعبرهم
بس اللي ما يدرون عنا نبيهم

انا متاكده انها سالفه مراهقه وبس
عقبها بتكبر وتفهم الحياة صح

اتوقع كل بنت مرة بفتره حب او اعجاب وانا متاكده ان اغلبها من طرف واحد

والاغلب بعد انهم يكونون من الاهل او ناس قراب من العايله

:)


كل كلامج درر درر درر

:)

Najmah said...

fatto
الله يسلمج ويخليج
نورتيني :)


.

.


شلالات
ايييوانا بعد اقول جذي
هذي مرحلة طبيعية
بس خلتني افكر بوايد اشياء
:)
حبيبتي والله من ذوقج
لا خلا ولا عدم
:*

صبا said...

الله يا نجمه احلي شي بالدنيا انج اتحبين وتنحبين من الناس وبالاخص من الي حواليج
الله شعور ثاني
امي ابوي اهلي
وصديقاتي وزملائي بالعمل
واي احد ثاني ,,حلو الواحد يحب وينحب
من صج ومن غير مصلحه وهدف من البعيد والقريب

الحب للحب وليس لشيئ آخر

يا نجمة سمانا
وانا بعد احبج واااايد
طافحه حب يا نجمه
عسي انشالله ايامج كلها حب

:****
تحياتي من قلب

esTeKaNa said...

one messege receiveD:Pp~

الحب والسعاده لم ولن تنحصر يوم بشخص او ظروف معينة وشروط
!!
الحب احساس متجدد من نبع الاحساس والصدق في داخلنا يجعلنا نرتبط بكل
وادق
وابسط التفاصيل والاحداث
الحب تؤملات في مشاعرنا حول العديد من الاشيا حولنا يجعلنا نرقبها
نتلذذ فيها
ونسعد دائما بها


تقولين:
لا تتوقف الحياة يوما لتنتظر شخصا حزين
وكذلك الحب .. فلن يقف يوما على حدود انسان
!!
كم انتي حكيمة
وصلتي الى ما مالم يصل له الكثير الا بعد سنين من الالم والحيرة
اختصرتي مشوار تجارب الالم والحزن بتلك الكلمات
نعم يا نجمة
لم ولن تتوقف الحياة
قد تنقبض قلوبنا قليلا
قد تعصرنا بعض المشاعر في داخلنا
ولكن بالنهاية
الحياة تجارب
ولن تتوقف الحياة
:)



نجمة ...ابداعك في هذا البوست مبهر
كنت اتمنى ان اسمعك صدى لكل كلمة كتبتيها لكن ان قمت بذلك فساكتب اكبر تعليق في تاريخ البلوقرز
;pP~
وعلى طاري المراهقة
سئلتني اختي قبل فتره :
استكانة ما كنتي معجبه في مغني؟
شاعر؟
لاعب؟
قلت لها اعجب في الفن ذاته لا الشخص
لاني ماحب حب المستحيل
دايما افكر واذا حبيته شدراه انه يحبني
!!
كان ينقصك ان تري وجه اختي وتعابير استغرابها الذي اضحكني
تقول:
انا قصدت اعجاب عادي
بس مادري انج تفكرين جذي
تمنين بحبج؟
قلت مو منة
بس افكر لازم يدري
وما راح يدري
فليش احبه
hehehehhehe


صباحج حب
:*

darkness said...

صبحج الله بالخير يا نجمه ضاويه بعالي سمانا

تدرين يا نجمه حلو انها وثقت فيج و اعترفت لج

الاحلى انج انتي بتحمينها من نفسها و من الوهم اللي اهي فيه

المشكله بهالسن انهم يبون كل شي بدون اي تفكير عقلاني

و دايما اهم الصح و غيرهم ما يدري عن شي

و دايما يغلقون الابواب بوجهه جميع الناس

فيعيشون بعالم خاص فيهم

انها دخلتج لهذا العالم

هذي ثقه كبيره عطتج اياها

:)

و ترى حلو اسلوبج القصصي

:)

Najmah said...

صبا
صباحج ورد :)
اييي والله صدقتي ياصبا
الحب مثل النسمة اللي تعطر حياتنا
لما تحسين بحب الناس من حواليج
شعور يكفي يخليج تنسين كل هم
ياحبيبتي والله انتي
وانا بعد احبج واااايد
وويااج يالغاليه صبا
:*



.


.




استكانة
صباحج جوري وياسمين :*
احم .. اشوا وصل المسج
:Pp
الحب احساس متجدد .. وايد عجبتني
:*
استكانة
كل ماكانت التجربة اقسى
كل ماقوّتنا اكثر
وعلمتنا اكثر
ونضجنا فيها اكثر
..
تصدقين لما الحين اذكر ذيج اللحظة
اللي بجيت فيها وانهرت على صدمة ماتوقعتها من اقرب الناس لقلبي
بس تدرين شكثر هالصدمة فادتني
على كثر ماقلبي راح فيها
على كثر ما الحين صرت اشكر ربي على هالصدمة اللي خلتني ارتقي بتفكيري ومشاعري وبأشياء وايد
واهمها ما اوقف حياتي وسعادتي على شخص ولا اضحي بمشاعري والناس اللي تعزني عشان شخص مايستحق هالشعور
مممم انا شلون وصلت اهني؟
:P
لووووووول
وناااسة اعجبتني اكبر تعليق
عادي الحين هابين كل شي اكس لارج
:P
هههههههه
ابييه تصدقين حتى انا نفسج
كانوا بنات خالتي مايصدقوني ويقولون لي شلون انتي جذي ماتحبين؟
واقولهم مايدري عني ليش احبه
لووووول اهم شي ان لما يكبرون يعترفون ان احنا الصح :P
سلمي على اختج الحلوة :)


.


.



داركنس
صبحج الله بالنور والسرور والمسك والبخور
:*
تدرين لأن مايبون احد ينكر عليهم
مايبون احد يقولهم لا وهذا غلط
عشان جذي يعيشون بعالمهم الخاص
انا ماتوقعت تقول لي اصلا
بس كنت فاهمتها وبنفس الوقت مابي ازفها او اسخر من مشاعرها
انا اتوقع مو بس هالعمر
بكل الاعمار لما الانسان يحس ان اللي جدامه ماراح يفهمه مستحيل يتكلم
ولما اللي جدامه يعطيه الثقة والامان والابتسامة اللي تريحه راح يفتح قلبه ويثق فيه :)
انا اليوم قاعدة من الصبح فيني وايد كلام مادري شسالفتي :)
مممممممم
تهقين أحوّل على القصص؟
:P

kazmawy said...

تدرين ان الحب شى عجيب
الى يذوقه يخاف من الفراق..والى يفارق يموت من العذاب..الله لا يبلينا الا بحب من يحبنا حب صادق..

charisma said...

صح السانج يا نجمه
احنا نعيش الحب ومافى قلب ينبض ما يحب او متعلق بشى قريب منه
بس تتفاوت من شخص لى اخر


لأن الحب مو كلمة وتنقال .. الحب مواقف وأفعال
لا تدورين على هالحب بعيد .. لأنه موجود معاج كل يوم
بس يبيج تشوفينه وتحسين فيه

مع الاسف وعيت على هالامر بعد تجارب قاسيه مو بس تجربه
والتجارب كانت من اقرب الناس

بعدها الكلام ما يقربنى ولا ياثر بمكانه انسان بقلبى كثر الفعل

الفعل اهو اثبات الحب

:**

Shather said...

فعلا ..
الحب لا يكون نقطه نهاية ..
بل على العكس
دائما ما يكون نقطة لبداية شيء اجمل


دمت بحب
:*

7osen said...

بس الحب بعد مختلف من شخص للثاني

مانقدر نتكلم عن الحب بجميع حالته بمعنى واحد

يعني حبي لأمي مثلاً مختلف جداً عن حبي لزوجتي مثلاً يعني

أو حبي لأبوي مختلف بعد عن حبي لصديقي

يعني إللي أبي أقوله إن في حب يؤلمنا وااايد وفي حب يطيبنا ويظللنا بالعطاء والحنان

وفي حب مايتغير دائماً الرسم البياني ماله على خط واحد
وفي حب لا يتغير مرة يودينا لأخر حدود الفرح ومرة ينزلنا لأخر درجات الحزن

الحب مختلف برأيي أنا
يختلف بختلاف الأشخاص إللي نحبهم

لكنه يظل بجوهره أساس الحياة

Najmah said...

كظماوي
آميين يارب
:)
والله يبعد الفراق والعذاب
شكرا لوجودك


.


.



كريزما
صح بدنج حبيبتي
لا يضيق خلقج وتتحسفين
تدرين ليش؟
لأن كل تجربة تعلمج وتقويج اكثر
صدقيني اللي يجرب الشي مو مثل اللي مايجربه
الله يريحج دنيا وآخره حبيبتي
:*



.


.



شذر
وهذا اللي قصدته :)
:*
نورتيني شذر
وعسى كل ايامج حب :)


.


.



حسين
اييي صح اكييد
كل حب يختلف عن الثاني
ومستحيل يتساوي حب مع حب آخر
لكن اللي قصدته
ان حوالينا ناس وايد تحبنا
وتحمل لنا اطيب المشاعر
ليش نخليها ونركض ورى شخص مايلتفت لنا :)
شكرا ياحسين
اسعدني تعليقك :)

Mok said...

روعة
:)

Shaima'a Alkandari said...

الحب له معانى كثيره ومتنوع

خلونا نحب اللى يحبنا احسن من ان احنا نحب ناس مايقدرونا

احلى شي الحب الصادق البريئ اللى مافيه اي نوع من المصالح

لمن تكبر راح تعرف وتفهم كل شي


نجمتنا دوما نستمد منج ضوء مميز ورائع

تسلمين

لؤلؤة said...

الله يا نجمة
كلام كبااااار
:)

قلب طفله said...

فترة مراهقه

و حب يعيشها جو الاغاني و

حالة الافلام و اغلبه يكون

من طرف واحد او طرف مخادع

ردج عليها رووووعه عشان ما

تعيش بالوهم و تفتح عيونها على

حب اروع و ابقى

عجيب البوست يا نجمه :)

دمتي بسعاده

Najmah said...

موك
الاروع تواجدك
شكرا :)


.

.

شيومة
صح لسانج والله :)
شيوومة النور نورج دايما
وردج له بريق خاص
:*


.

.


لؤلؤة
حبيبتي انتي
حياااج :))


.

.

قلب طفلة
ايي انا فاهمه انها مجرد فترة وتروح
بس مابيها تعيشها وايد
:)
حبيبتي انتي الروعه والله
تسلمين يالغاليه
:*

Flowera said...

لأن الحب مو كلمة وتنقال .. الحب مواقف وأفعال
لا تدورين على هالحب بعيد .. لأنه موجود معاج كل يوم
بس يبيج تشوفينه وتحسين فيه
!!

صدقتـــي !!